Siglir tar il cuntegn

Chantun Suenter passa 40 onns èsi uras per ina nova lescha da vischnancas

La regenza grischuna ha deliberà il sboz d'ina nova lescha da vischnancas per la consultaziun. Motiv per la midada n'è però betg la vegliadetgna da la lescha.

massa vopnas da vischnancas grischunas ina sur l'autra
Legenda: Sch'i va tenor la regenza, duessi dar ina nova lescha per las anc 114 vischnancas grischunas. RTR

La lescha da vischnancas or da l'onn 1974 saja bain sa cumprovada. Pervia da numerusas revisiuns haja la legibladad da la lescha dentant patì, argumentescha la regenza grischuna quest sboz per ina nova lescha da vischnancas.

Plinavant serrian ins cun quella nova lescha er largias giuridicas e resguardia la refurma da vischnancas cun las fusiuns. La nova lescha duai vinavant tegnair quint a la grond'autonomia da las vischnancas grischunas ed il dumber da regulaziuns na duai betg s'augmentar. Tuttina datti ina u l'autra midada. Qua las pli impurtantas:

  • En ina vischnanca cun parlament, na duai betg pli dar ina radunanza communala.
  • Las executivas duain avair tschintg u set commembras e commembers.
  • I na dovra betg pli ina basa en il dretg communal per votaziuns consultativas (da nov tenor dretg chantunal).
  • Sesidas dal parlament sco er radunanzas communalas duain esser da principi publicas.
  • Excorporaziuns da facultad da vischnancas burgaisas n'èn betg pli admissiblas.
  • La fusiun da vischnancas vegn reglada sin basa da las experientschas fatgas l'ultim decenni.
  • I n'è betg pli pussaivel da furmar novas fracziuns sco corporaziuns autonomas.
  • Differents termins vegnan adattads a las relaziuns actualas, p. ex. l'inoltraziun dal quint annual u la convocaziun da la radunanza communala).

Vischnancas ston augmentar dumber da suprastants

Il segund punct che pretenda che suprastanzas communalas duain avair tschintg u set commembers vegnia segiramain a dar da discutar, manegia la cussegliera guvernativa responsabla Barbara Janom Steiner. Rongellen, Urmagn, Samignun ed er la citad da Cuira stuessan numnadamain schizunt augmentar lur dumber da suprastants sin tschintg u set.

La lescha duai entrar en vigur il prim da schaner 2018. La consultaziun dura fin ils 20 d'october 2016.

RR novitads 10:00