Al timun da l'inspecturat da pumpiers dal Grischun, datti ina midada. Conradin Caduff daventa nov inspectur e cun quai il pli aut pumpier dal chantun. El surpiglia il post da Hansueli Roth ch'è stà 24 onns al timun e va uss en pensiun. Quai ha communitgà l'assicuranza d'edifizis dal Grischun. Caduff surpiglia il post il prim da november 2020. Quai munta ch'el maina lura er la partiziun pumpiers da l'Assicuranza d'edifizis dal Grischun GVG.
Conradin Caduff ha fatg la scolaziun da scolast primar ed ha fatg il Master of Advanced Studies en management da furmaziun. L'onn 2012/13 è el daventà manader da scola da la scola Lumnezia ed ha er dà scola sin il stgalim superiur da lezza. Tar ils pumpiers è Caduff stà instructur, cumandant ed inspectur dal district. Hansueli Roth ha manà 24 onns l'inspecturat e vegn pensiunà la fin december. Suenter surpiglia Roth il presidi da la vischnanca da Claustra.