Oriundamain quintavan ins, ch’il blau egipzian saja ì en emblidanza enturn il quart tschientaner. Perquai èsi stà ina surpraisa per l’istoricher d’art Michael Wolf cur ch’el ha chattà quest pigment vid purtrets che dateschan dal 9avel u 10avel tschientaner.
Cun analisa multispectrala sin ils fastizs d'ina colur antica
Chattà quest pigment en la baselgia da Mistail ha Michael Wolf cun sia analisa multispectrala. Cun differentas glischs, filters e cun in apparat da fotografar dad auta resoluziun po el render vesaivel las materialias e metodas ch’èn vegnidas duvradas per picturar ils purtrets. Quai èn pussaivladads, che la tecnica moderna porscha pir uss.
Betg scriver da nov l'istorgia grischuna
Tenor il protectur da monuments Simon Berger laschia il fatg, che quest prezius pigment è vegnì duvrà a Mistail supponer, che persunas ritgas e pussantas hajan dà l’incumbensa da far quests purtrets. Ils purtrets cuvrivan probablamain tut las paraids da la baselgia sco quai ch’i era usit en il temp carolingic.
Tant Simon Berger sco er Michael Wolf supponan, ch'ils contacts da l’incumbensader sajan ids fitg ad aut – u en l'ierarchia da la dinastia carolingica u er en ils circuls dal Papa a Roma. L'istorgia grischuna na saja perquai betg da scriver da nov, di Simon Berger. I dettia dentant novs aspects ch’enritgeschian ella.
Il blau egipzian dad ina giada – in pau sco pulvra da lavar dad oz
Il blau egipzian n’era betg mo fitg cumplitgà da producir, mabain duvrava er gronda savida per il diever. El na vegniva betg duvrà sulet per colurar blau, mabain era sco effect, declera Michael Wolf.
Il blau egipzian vegniva maschadà en autras colurs, uschia per exempel en l’alv. L’effect era il medem sco tar il lavar resti alv ozendi. Là vegn era agiuntà blau en la pulvra per che l’alv glischia pli fitg. Il medem vegniva fatg cun il blau egipzian.
TR Telesguard 17:40