Siglir tar il cuntegn

Header

cuntegn

Sururas per il Cussegl grond La lescha d'energia è revedida

Igl è dumagnà: Suenter ina lunga debatta han deputadas e deputads approvà la revisiun cleramain cun 69 cunter 18 vuschs. Ina proposta da Reto Crameri (PCD) d’interrumper la debatta e da spustar ella sin la sessiun d'avrigl è vegnida refusada cun 45 cunter 40 vuschs (tar 8 abstenziuns).

Bunamain 10 uras ha il Cussegl grond debattà co reveder la lescha d'energia. Ils motivs daco che la debatta ha durà uschè ditg:

  • Il cumbat tranter la sanestra ed ils burgais: Entant che socialdemocrats e verd-liberals vulevan ina lescha pli rigurusa, han PCD, PBD e PLD cumbattì per in cumpromiss per tuts.
  • Adina puspè hai dà singulas propostas da deputadas e deputads – propostas che n'eran per part betg vegnidas inoltradas ordavant a la cumissiun.

audio
La politica dal clima arda – quai er en il Cussegl grond
ord Actualitad dals 12.02.2020.
laschar ir. Durada: 3 minutas 43 Secundas.

Debatta d'entrada plain energia

Che las partidas han fitg differentas opiniuns co reveder la lescha d'energia è sa mussà gia al cumenzament da la debatta. Las pretensiuns da dretg e sanester n'han dentant gì nagina schanza: Schebain la proposta da la PPS da betg entrar en debatta sco era quella da la PS da renviar la lescha a la regenza han deputadas e deputads refusà.

Enfin che auters pajais sco la China na fan nagut per reducir las emissiuns da CO2, pudain nus be guardar tiers.
Autur: Duosch Fadri Felix Deputà PLD, Scuol
Nus avain empruvà da chattar in cumpromiss che tuts pon sustegnair.
Autur: Clemens Berther Deputà PCD, Mustér
Jau sun trumpada! Malgrà l'unda verda tar las elecziuns naziunalas e la giuventetgna che va sin via, preschenta la regenza ina proposta senza curaschi.
Autur: Franziska Preisig Deputada PS, Samedan
audio
Regenza: Lescha d'energia – debatta emoziunala dretg e sanester
ord Actualitad dals 12.02.2020.
laschar ir. Durada: 4 minutas 9 Secundas.

Per tge vai?

Cun reveder la lescha d'energia ha il Cussegl grond fixà reglas per spargnar energia tar bajetgs ubain duvrar pli effizient l'energia. Ils pli impurtants puncts èn:

  • Chasas novas duain producir sezzas ina part da l'energia, per exempel cun montar indrizs solars.
  • Tgi che remplazza ina pigna d’ieli u da gas sto cumpensar ina part cun energias regenerablas.
  • Tgi che sanescha bajetgs uschia ch’els spargnan energia, po trair giu ina part dals custs da la taglia.

video
Votums ord la debatta davart la lescha d'energia
Or da Telesguard dals 12.02.2020.
laschar ir. Durada: 3 minutas 15 Secundas.

Manà tras la debatta ha il president da la cumissiun d'energia, Emil Müller (PBD). Pliras giadas ha el lamentà che deputadas e deputads han proponì d'adattar ubain stritgar passaschas ord la lescha senza avair infurmà ordavant la cumissiun. Uschia na possia la cumissiun betg discutar ordavant las propostas ed el sco president na sappia era betg represchentar la posiziun da la cumissiun.

Durant las preparativas haja surtut la dumonda da la taglia dà il pli bler da discutar:

audio
Regenza: Spargnar energia, spargnar taglia? Tenor Emil Müller in punct da discussiun
ord Actualitad dals 12.02.2020.
laschar ir. Durada: 2 minutas 56 Secundas.

La debatta ha era interessà la giuventetgna: Sin tribuna han prendì plaz scolaras e scolars da pliras classas ed avant la debatta han giuvnas e giuvens dal moviment dal clima en il Grischun demonstrà avant il bajetg dal Cussegl grond.

RTR actualitad 07:00

Artitgels legids il pli savens