Siglir tar il cuntegn

Header

Navigaziun

cuntegn

Survista da la racolta Tscherts purs èn cuntents – auters betg

Las differenzas regiunalas èn quest onn fitg grondas: Ils purs han gì da cumbatter cunter divers inimis – davent da coss fin tar ina flura cun num claffa.

La racolta da fain è fin qua fitg differenta, tut tenor regiun. Perfin entaifer las vischnancas dettia differenzas, declera Batist Spinatsch, manader da la cussegliaziun purila al Plantahof. Tuttina possian ins resumar che spezialmain ils purs en il Puschlav sajan fitg cuntents cun la racolta 2019.

La charta dat ina survista approximativa da la situaziun en Grischun:

Grafica che mussa la racolta da fain tenor regiun
Legenda: Las indicaziuns sa basan sin ina stimaziun ord las regiuns, betg sin cifras exactas. RTR

Las regiuns en il nord dal Grischun han patì l'onn passà pli ferm da la sitgira e quai è er da sentir fin uss. En la Cadi e l'Engiadin'Ota n'è la racolta betg uschè mala. En Engiadin'Ota ha la racolta dentant pir gist cumenzà.

En Grischun Central è la situaziun fitg varianta tranter prads cun fitg nauscha racolta fin a da quels cun fitg buna racolta.

Resuns positivs e negativs dals purs

Sco manader da la cussegliaziun purila ha Batist Spinatsch survegnì buns e nauschs resuns dals purs en il chantun Grischun. En la Surselva dettia regiuns che hajan gì da cumbatter cunter il coss. En l'Engiadina Bassa saja la sitgira, la schelira da la primavaira u la flura claffa (flur da tissi) stadas grondas sfidas. Sco Batist Spinatsch di, saja la claffa dentant stada en l'entir chantun in zic in problem.

Malgrà tut las sfidas sin ils prads en il Grischun, è el optimistic che l'onn 2019 vegnia in bun onn:

L'onn passà è stà in onn magher. Quest onn crai jau che nus avain in onn en media u perfin sur la media.
Autur: Batist Spinatschmanader da la cussegliaziun purila al Plantahof

Tuttina saja uss anc memia baud da trair bilantscha. En l'Engiadina haja la racolta da fain pir cumenzà. Batist Spinatsch spera ch'i na fa uss betg aura sco l'onn passà, cura che la stad è stada fitg sitga.

RR actualitad 12:00