Cun viadis circulars, l'uschenumnà «touring», vul Grischun Vacanzas carmalar dapli giasts en il chantun. Touring saja in segment turistic che creschia fermamain, scriva il chantun. La regenza sustegna perquai il project Alpine Circle Grischun da Grischun Vacanzas cun ina contribuziun da 900'000 francs en il rom da la nova politica regiunala. Chantun e Confederaziun pajan mintgamai ina mesadad.
Il viadi circular maina a 4 attracziuns principalas en Grischun:
- Ruinaulta – aventura en la chavorgia,
- Vadret da Morteratsch – aventura sin il glatscher,
- viaduct da la Landwasser – aventura cun la viafier
- Parc naziunal svizzer – experientscha en la natira.
Questas 4 attracziuns duain vegnir cumplettadas cun var 10 ulteriuras attracziuns secundaras e cun activitads attractivas specificas per gruppas en mira en tut il Grischun.
La finamira dal project Alpine Circle Grischun è quella da gudagnar dapli giasts per il Grischun ed uschia er generar dapli pernottaziuns en las destinaziuns. Il project cumenza previsiblamain gia la stad 2020 e dura 2 onns e mez fin il december 2022 e custa tut en tut circa 4,1 milliuns francs.
