Siglir tar il cuntegn

Chantun Sustegn per artists rumantschs

Il chantun Grischun ha era quest onn surdà contribuziuns per promover la lavur culturala professiunala. Dals 46 projects inoltrads da las spartas musica, litteratura, teater ed art figurativ, vegnan en tut 10 sustegnids – quatter da quests projects sustegnids vegnan d'artists rumantschs.

Il reschissur da teater Roman Weishaupt è in dals artists rumantschs che survegn sustegn dal chantun.
Legenda: Il reschissur da teater Roman Weishaupt è in dals artists rumantschs che survegn sustegn dal chantun. mad

Cun las contribuziuns ad ovras promova il chantun Grischun projects culturals artisticamain interessants, independents e realisabels. Las contribuziuns vegnan pajadas ad artistas ed artists che demussan in potenzial da svilup en lur activitad. Il sustegn finanzial als duai procurar la libertad necessaria per elavurar lur ideas e lur projects e per sviluppar vinavant lur activitad artistica.

Il departament d'educaziun, cultura e protecziun da l'ambient ha decidì che las suandantas 10 artistas ed artists survegnan ina contribuziun da mintgamai 20'000 francs:

  • Jann Duri Bantli per ses project da cudesch «Marco Camenisch»
  • Pascal Gamboni per ses project da musica «Paisch el cor per Paul Anselma»
  • Ursina Giger per ses project da musica «Ursina fa in album»
  • Silvio Huonder per ses project da cudesch «Rauch»
  • Alvin Muoth per ses project da musica Grond oratori mundan per chor e per orchester, «Egl artg dils meins» che sa basa sin 12 texts nunpublitgads da dr. Arnold Spescha
  • Cordula Seger per ses project «Chesa sur l'En a San Murezzan – biografia d'ina chasa» (istorgia e memoria)
  • Ester Vonplon per ses project d'art «Otavia»
  • Roman Weishaupt per ses project da teater «E tgei resta?»
  • Dominik Zehnder per ses project d'art «tracce»
  • Thomas Zindel per ses project d'art «TEC NEV»