Siglir tar il cuntegn
cuntegn

Chantun Sut nov tetg – Stoffel venda Priora SA en Frantscha

L’investider Remo Stoffel venda l’interpresa generala Priora SA al concern da construcziun franzos Eiffage. Quai ha scrit il concern franzos la gievgia en ina communicaziun a las medias.

La Tour Eiffel.
Legenda: Da tur a tur – Stoffel, che vul fabritgar ina tur a Val S.Pieder, fa affars cun la firma, ch'ha fabritgà la Tour Eiffel a Paris. Keystone

Sin sia pagina en la rait scriva il concern franzos Eiffage, ch'el haja acquistà via sia filiala Eiffage Construction la Priora SA. Quella saja ina dals «leaders da la construcziun en Svizra tudestga». Questa acquista permettia a la Priora SA da cuntinuar cun ses svilup, scriva la nova proprietaria da la Priora SA senza vegnir pli concreta.

La cumpra fetschia part dal svilup europeic dad Eiffage e rinforzia la posiziun da la gruppa en Svizra, finescha l'Eiffage ses communiqué.

Remo Stoffel restia acziunari principal da Priora Holding SA

L'interpresa generala Priora SA è ina part da la Priora Holding SA. Per la Priora SA lavuran radund 450 persunas en 9 differents lieus, tranter auter er a Cuira.

Tar la Priora Holding SA tegnia l'interprendider Remo Stoffel vinavant la gronda part principala da las aczias. Uschia citescha la gasetta Südostschweiz a Hans-Peter Domanig, il president dal cussegl administrativ da la Priora Holding SA. La gruppa mamma, la holding, veglia sa concentrar sin la cumpra d'immobiglias en la regiun da la plazza aviatica a Turitg.

Eiffage construescha e s'occupa dad immobiglias

Eiffage, la gruppa mamma dal cumprader da la Priora SA, occupescha 65'000 persunas en tut il mund e fa ina svieuta da 15 milliardas Euro – 21% da quella dador la Frantscha. Il concern lavura sin ils secturs da construcziun e dad immobiglias insumma. En la rait è da leger en pli, ch'Eiffage haja gia fabritgà la Tur Eiffel a Paris.

Dapli tar la Priora Holding SA

Plazzal da fabrica cun logo Priora.
Legenda:Keystone

Ella è la gruppa mamma da 4 differents secturs d’affar:

  • La Priora SA è l'interpresa generala, uss vendida, CEO Raffael Brogna.
  • La Priora FM SA cun differentas administraziuns d’immobiglias, CEO Bernard Heinimann.
  • La Priora Services SA cun management da portfolio ed administraziuns d’immobiglias sut direcziun da Roland Gemperle.
  • La sparta immobiglias e participaziuns sut la direcziun da Remo Stoffel, sez cun las immobiglias a l’eroport da Turitg, la 7132 SA a Val e la Famek Services LL a Dubai.

Funtauna: priora.ch

RR novitads 06:00