Svegliar l'interess per il rumantsch dad uschè blers sco pussibel

Dar ina invista en il linguatg ed en la litteratura rumantscha e svegliar l'interess dad uschè bleras studentas e students sco pussibel per in linguatg minoritar ed ina cultura alpina – lunsch davent da Genevra. Quai è la finamira principala da Renzo Caduff.

Renzo Caduff. Bild in Lightbox öffnen.

Legenda da maletgs: Renzo Caduff, il nov docent da rumantsch a l'Universitad da Genevra, ha cumenzà la lavur l’avust. RTR, G. Caviezel

Avant bun in' emna ha Renzo Caduff (39), oriund da Mustér, cumenzà cun sia nova incumbensa sco docent da rumantsch a l'Universitad da Genevra. Il program per las 4 lecziuns ch'el dat quest semester ha el dentant schon stuì inditgar avant.

Uschia dat quai per exempel in curs da linguistica, nua ch’el tematisescha la percepziun dal rumantsch. «Co vegniva il rumantsch per exempel percepì pli baud la fin dal 18avel tschientaner,» explitgescha il spezialist da linguatg e litteratura rumantscha ch’ha doctorà. «Nua che la glieud sa dumandava sch’il rumantsch è in latin corrut u èsi ina maschaida da franzos e talian.»

En la part da la litteratura ha el elegì per l’emprim semester text da l’autur sursilvan Leo Tuor. In autur engraziaivel per tematicas ch'han da far cun cultura, che tematisescha la societad en la Cadi.

Avischinar els a l’idiom

Ina raschun per ils texts da Leo Tuor èn tenor Renzo Caduff era, ch'i dat translaziuns franzosas da quels, pertge il Franzos è en sasez il linguatg d'instrucziun a l'Universitad da Genevra. «Quai che na vul dentant betg dir exnum ch'ils students emprendan insumma betg da discurrer ni chapir rumantsch», manegia Renzo Caduff ch’ha in pensum da 40% al l’Universitad da Genevra. «En il curs d’introducziun emprendain nus ina varietad rumantscha. Mia idea è d’avischinar els a l’idiom Sursilvan, mes linguatg mamma e forsa era duvrar il Rumantsch Grischun sco varietad da punt per ils auter idioms.»

A la fin dals curs, da las lecziuns, duessan ils students lura, sch'i va tut tenor plan, savair far ina simpla conversaziun per rumantsch ed era savair tadlar e chapir il cuntegn da las contribuziuns rumantschas da radio e televisiun.

Rumantsch sco modul interessant ed attractiv

Con blers students ch'el vegn ad avair la fin finala, na sa el betg anc. El quinta dentant cun circa 10, 12 students – uschè blers sco tar ses antecessur Clau Solèr.

La finamira da Renzo Caduff è da motivar uschè blers students sco pussibel da far part a las lecziuns rumantschas e da pudair uschia posiziunar il rumantsch sco modul interessant ed attractiv a l'Universitad da Genevra.