Mintgina e mintgin po lura s'inscriver en il Cudesch da las Rumantschas e dals Rumantschs e survegn in document persunal. Pli tard pon ins era sa registrar via la pagina d'internet da la Lia.
Finamira è in dumber represchentativ
Las indicaziuns davart il dumber da persunas che discurran rumantsch varieschan numnadamain tranter 30'000 e 60'000. Ed i dat schizunt la cifra da 100'000 persunas che consumeschan mintga di medias rumantschas. La finamira da l'acziun saja perquai da survegnir in dumber detg represchentativ di David Flepp da la Lia. In'autra finamira saja er da survegnir ina resposta sin la dumonda: Tgi è insumma ina Rumantscha u in Rumantsch? Tgi sa quinta e sa senta sco Rumantscha u Rumantsch?
Acziun dura 4 onns
L'acziun da registraziun saja in'acziun a lunga vista ha ditg David Flepp. L'onn 2019 po la Lia festivar ses 100avel anniversari. Per avair fin lura in dumber detg represchentativ da Rumantschas e Rumantschs duria l'acziun fin il 2019.