La Tagesschau ha emess en l'emissiun dad ier saira ina contribuziun davart il svilup da las linguas en Svizra. Ma il rumantsch na vegn betg menziunà. Quai ha chaschunà inqual commentari agità sin Facebook. Franz Lustenberger, producent da la Tagesschau declera pertge ch'il rumantsch na vegn betg menziunà. Ins saja sfurzà da decider in cler focus, ed il focus en la contribuziun dad ier saira sajan las linguas principalas en Svizra: tudestg, franzos e talian.
Contribuziun sa basa sin cifras dal Uffizi federal per statistica
Ultra da quai sa basia la Tagesschau sin las cifras da l'Uffizi federal per statistica. Là vegnia il rumantsch be menziunà curt. Quai conferma er Jacqueline Kucera da l'uffizi. Er els stoppian sa focusar en lur communicaziuns a las medias. En l'evaluaziun sco tala vegnia il rumantsch dentant prendì sut la marella sco er las autras linguas.
Tagesschau conceda
En la moderaziun saja bain vegnì detg che la Svizra saja in pajais quadriling, dentant avess ins pudì declerar anc pli explicit il focus da la contribuziun. Uschia na fissan talas malchapientschas betg capitadas. En l'emissiun da gievgia saira ha il team da la Tageschau lura declarà pertge ch'els han laschà davent il rumantsch. Tar il rumantsch na saja statisticamain betg sa midà bler. Els deploreschian dentant sche questa decisiun haja disturbà tscherts aspectaturs.
Lia Rumantscha intervegna
La Lia Rumantscha ha communitgà da vulair intervegnir tar il Servetsch da mediaziun da la SRG pervia da quest rapport. La contribuziun cuntrafetschia a las pretensiuns da la Lescha federala davart radio e televisiun. Quella pretenda ch'ils fatgs vegnian preschentads a moda adequata. Il rumantsch è francà en la Constituziun sco lingua naziunala e lingua parzialmain uffiziala.
RR novitads 16:00