Uss èsi uffizial: Sco ch’il magazin da branscha «Schweizer Journalist» aveva gia communitgà èn ils dis da la «Schweiz am Sonntag» quintads. A partir dals quatter da mars vegni a dar enstagl da duas ediziuns la fin d’emna mo anc ina.
Somedia: «Vossa dumengia cummenza gia en sonda»
Sut quest titel sa drizzan l’editur Hanspeter Lebrument e ses CEO Andrea Masüger en l’editorial da l’ediziun da la «Südostschweiz» dad oz sonda a las lecturas ed als lecturs: Per pudair «garantir er in avegnir la qualitad dals cuntegns» dettia per la fin d’emna ina gasetta cun il titel principal «Südostschweiz» ed il suttitel «Schweiz am Wochenende».
Ils dus responsabels motiveschan il pass cun vulair spargnar custs da producziun en il print a favur da pudair mantegnair la qualitad tar l’incumbensa principala, che saja l’infurmaziun schurnalistica.
Uschia possian il lectur e la lectura decider sez, cura ch’els veglian leger durant la fin d’emna lur gasetta. En pli vegnia mess pais dad actualisar las infurmaziuns da la gasetta durant la fin d’emna en la rait, scrivan ils dus responsabels.
AZ Medien: «Investir en prestaziun schurnalistica e qualitad»
Uschia motivescha er l’interpresa da medias AZ Medien en sia gasetta «Nordwestschweiz» dad oz sonda ch’i na vegn betg pli a dar la «Schweiz am Sonntag».
La AZ Medien aveva lantschà als 16 da settember 2007 sia gasetta da dumengia «Sonntag» cun 240’000 exemplars. L’onn 2013 è quella vegnida messa ensemen gasetta cun la «Südostschweiz am Sonntag» per daventar la «Schweiz am Sonntag» cun in’ediziun da 203’156 exemplars.
Actualmain èn quai anc 190’176, scriva l’agentura da novitads svizra SDA tenor la pagina da la gasetta. Las cifras da la WEMF mussavan si l’avrigl passà 345’000 lecturas e lecturs.
RR novitads 12:00