La taskforce grischuna che s'occupa per il mument da las consequenzas economicas dal coronavirus sa cumpona da persunas ord l'economia ensemen cun il chantun. I vegn elavurà schliaziuns per l'economia che patescha. Cunzunt interpresas pitschnas e mesaunas sentian vid lur liquiditad la mancanza d'entradas e stoppian quintar cun sperditas. Entant che tut stat airi curran ils custs fixs enavant, di Daniel Fust, CEO da la Banca Chantunala Grischuna.
Il chantun saja dentant gia s'organisà en ina taskforce per guardar co sa gidar cun l'economia.
Per exempel vegn tschantschà sur da lavur curta ubain sur da spustar termins da taglia.
Spustar amortisaziuns
Detagls na po Fust però anc betg tradir. Tge ch'el po dentant dir è, che er la Banca Chantunala Grischuna haja decidì mesiras per sa gidar cun ses clients. Passa 60 pertschient da las KMUs dal Grischun tutgan tar ils clients da la GKB. Lur offerta è, che quels pon spustar amortisaziuns sin pli tard sch'els na vegnan betg pli da pajar quellas. Il medem vala er per tschains chasa che giessan a la banca. Er quels pon vegnir spustads sin pli tard sch'ils clients èn en miserias da liquiditad.
