Siglir tar il cuntegn

Header

cuntegn

Chantun Tavau e San Murezzan euforic - Cuira main

Sco lieu ospitant per la candidatura per gieus olimpics 2026 vegnan Tavau, San Murezzan e Cuira en dumonda. Tavau e San Murezzan eran gia part dal project per ils gieus olimpics 2022. Ed era en la candidatura 2026 vulan els giugar ina rolla centrala. A Cuira perencunter èn ins pli retegnì.

Tavau vul daventar host-city

L’idea da daventar lieu ospitant dals gieus olimpics 2026 plascha fitg bain al Landamma da Tavau, Tarzisius Caviezel. Tavau vessi era da bun questa rolla. Pertge il passlung saja la singula disciplina populara prevesida a Tavau. Vitiers duain esser a Tavau las concurrenzas da hockey da dunnas, siglir cun skis acrobatic e moguls, la concurrenza sin la pista da bots. Caviezel ha gia gì in emprim discurs cun il president da vischnanca da San Murezzan. Ussa dovria quai ulteriurs discurs, cun la regenza, per vegnir in pass vinavant.

Tarzisius Caviezel
Legenda: Tarzisius Caviezel RTR
Questa idea plascha fitg bain a mai.
Autur: Tarzisius Caviezel Landamma da Tavau

Era San Murezzan vul

Betg mo a Tavau èn ins interessà, era San Murezzan vul giugar ina rolla principala en la candidatura per gieus olimpics 2026. Tenor il president Sigi Asprion surtut perquai che San Murezzan è il sulet lieu che fiss per la terza giada lieu ospitant per gieus olimpics. Ed il num San Murezzan saja gia enconuschent sin l'entir mund. Impurtant saja dentant da chattar la soluziun che saja la meglra per la candidatura grischuna.

Sigi Asprion
Legenda: Sigi Asprion RTR
L’interess dad esser host-city è fitg grond.
Autur: Sigi Asprion President communal San Murezzan

Cuira ha anc retegnientschas

En la chapitala grischuna èn ins il mument anc pli retegnì. Tenor il president da Cuira, Urs Marti stoppian ins esser conscients, che quai saja ina gronda chaussa e che bleras dumondas sajan anc avertas. Cur ch’ins sappia dapli, stoppian ins sco emprim dumandar il pievel. Da principi chatta Urs Marti da far Cuira tar il lieu ospitant ina bun’idea. Pertge sch’i dettia ina candidatura grischuna, stoppia la chapitala grischuna era esser part da quella.

Urs Marti
Legenda: Urs Marti RTR
Ins sto esser conscient che host-city è ina fitg gronda chaussa.
Autur: Urs Marti President da Cuira

Artitgels legids il pli savens