Tranter Nadal e Bumaun carmala la Cuppa Spengler mintg'onn fans da hockey a Tavau. Ina occurenza, ch'emplaina er hotels – cun quantas pernottaziuns exact na sa l'uniun da turissem betg dir. Quest onn vegnan dentant nagins fans dal turnier tradiziunal. Sper il WEF sto Tavau er desister da la Cuppa Spengler.
«Uschia stuain nus anc pli fitg empruvar da carmalar giasts Svizzers en ils hotels», di Tamara Henderson, presidenta da la Hotel Gastro Tavau. Cunquai che la cuppa Spengler è mintgamai tranter ils dis da festa spera ella, ch'ils hotels na perdian betg memia bleras pernottaziuns. E per l'emna dal WEF saja la Hotel Gastro vid ponderar ensemen cun las pendicularas e l'uniun da turissem ina purschida speziala. Il WEF procurava mintga onn per radund 37'000 pernottaziuns a Tavau.
