Siglir tar il cuntegn
cuntegn

Chantun Teater Giuven Grischun ha cumenzà la stagiun

Cun novas cunvegnas da prestaziun ha l'uniun cumenzà la stagiun. Per la primavaira vegnan preparadas trais producziuns en trais regiuns dal chantun.

Teater Giuven Grischun, da sanester: Martina Mutzner, Roman Weishaupt, Annina Sedlacek, Barbara Schneider, Lorenzo Polin e Fiona Schmid.
Legenda: Teater Giuven Grischun, da sanester: Martina Mutzner, Roman Weishaupt, Annina Sedlacek, Barbara Schneider, Lorenzo Polin e Fiona Schmid. RTR, Angela Hendry

La cunvegna cun il chantun vala per ils proxims 4 onns. Tar ils 30'000 francs fixads dastga il Teater Giuven Grischun er anc dumandar ulteriuras contribuziuns per singulas producziuns. Quai communitgescha l'organisaziun. Cun la cunvegna sa declera l'uniun pronta da preschentar almain duas producziuns ad onn en duas differentas regiuns grischuns.

En pli èsi gartegià als responsabels da contractar la cunvegna cun la citad da Cuira da nov. Enfin uss pajava la citad per stagiun mintgamai 3'000 francs a l'uniun sco contribuziun da basa. En pli devi mintgamai ulteriur sustegn finanzial per singuls projects. Cun la nova cunvegna paja Cuira uss ad onn mintgamai ina contribuziun fixa.

Giuvens fan teater a Cuira, en Surselva ed en Engiadina

Cun ils curs da teater a Cuira ha il Teater Giuven Grischun cumenzà la nova stagiun suenter las vacanzas d'atun. Per la primavaira preparan ils giuvens acturs sustegnids da pedagogs da teater professiunals trais differentas producziuns.

A Cuira sa fatschenta Fiona Schmid ensemen cun ils acturs cun il drama «Frühlingserwachen» da Frank Wedekind. Il toc tracta da giuvenils che vegnan confruntads cun ils problems da l'intoleranza da la societad e dals creschids.

En Engiadin'Ota datti ina coproducziun cun l'hotel Waldhaus a Segl-Maria per il giubileum da 111 onns da l'hotel. Il curs da basa cuzza fin Nadal e vegn manà da Lorenzo Polin. A partir dal schaner preparan ils giuvenils lura ensemen cun Roman Weishaupt ina preschentaziun da teater.

En Surselva elavura Barbara Schneider ina producziun da teater cun ils giuvens. En il center da la lavur stat l'autur Ödön von Horvath.

Ultra da quai porscha l'uniun durant las vacanzas da primavaira duas emnas da teater en la Surselva ed en Engiadina per uffants a partir da 10 onns.

RR novitads 11:00