Siglir tar il cuntegn

Header

cuntegn

Telefons tut a dubel Bleras dumondas en connex cun vaccinar

12 fin 16 persunas respundan actualmain di per di da quai da 500 fin 650 telefons tar la hotline dal chantun. Ils cuntegns dals discurs van davent da dumondas per sustegn tar l'annunzia fin tar laud e reclamaziuns en connex cun ils vaccins cunter il coronavirus. Il basegn da s'informar saja actualmain fitg grond, conferma il minister da sanadad Peter Peyer. Savens veglia la glieud er savair, daco ch'i n'hajan anc nagin termin, schegea ch'els sajan gia s'annunziads.

Ch'ils telefons stgalinan tut a dubel, vesa il minister da sanadad sco signal positiv. Quai mussia numnadamain che la prontadad da sa laschar vaccinar ed er il giavisch da survegnir in termin, saja fitg grond. Uschia n'haja la glieud magari er betg tanta pazienza fin ch'i survegnian in termin.

Da studentas fin tar la protecziun civila

Be cun persunal dal chantun na fissi betg pussaivel da dumagnar tut la lavur en la centrala da telefon. Perquai hajan els da l'entschatta davent gì sustegn da studentas e students da la Scol'auta da pedagogia dal Grischun. Quels stoppian però er insacura puspè sa deditgar al studi. Sur la protecziun civila ed il servetsch civil che sa gidian er, dettia magari er contacts tar autras persunas che hajan gist temp per sa gidar, uschia Peter Peyer. I saja bain ina sfida da chattar avunda glieud senza surtrar il budget, ma fin ussa saja quai gartegià.

Strusch «turissem da vaccinar»

Dad auters chantuns na dettia quai betg uschè blers ch'emprovian da survegnir in termin en il Grischun. I saja pussaivel ch'insatgi d'ordaifer il Grischun survegnia in termin, ma il pli tard cura che quella persuna vegnia en il center da vaccinar, vegnia ella puspè tramessa a chasa.

Quai ch'els possian constattar: I dettia persunas ch'emprovian da survegnir pli baud in termin che quai ch'els avessan da bun. Ma era quai sa sclereschia lura il pli tard al termin da vaccinar. Era quellas persunas stoppian quintar da stuair turnar a chasas senza vaccinaziun.

RTR actualitad 12:00

Artitgels legids il pli savens

Scrollar a sanestra Scrollar a dretga