Siglir tar il cuntegn

Header

audio
Ils canonis n'han betg elegì in nov uvestg per Cuira – las raschuns
Or da Actualitad dals 24.11.2020.
laschar ir. Durada: 05:28 minutas.
cuntegn

Tenor infurmaziuns d'insider Canonis n'èn betg entrads en discussiun per in nov uvestg

La glista cun ils trais nums da Roma na saja betg stada acceptabla. Uss duai il papa decider, co vinavant cun l'uvestgieu da Cuira.

Ils 22 canonis sajan gnanc entrads en la debatta d'eleger in nov uvestg. Per la maioritad plitost conservativa na saja la glista, che Roma ha preschentà per la successiun da Vitus Huonder, betg stada acceptabla. Quai ha ditg in insider envers RTR. Er il «Tages-Anzeiger» ed il portal d'internet kath.ch avevan gia rapportà en quest senn.

Sin la glista che Roma ha preschentà, sajan stads trais nums. Els tuts valan sco spirituals plitost moderads.

  • Vigeli Monn (avat da la claustra da Mustér)
  • Joseph Bonnemain (uffizial da l'uvestgieu da Cuira)
  • Mauro Giuseppe Lepori (avat general dals cisterziens a Roma)

Sin ina dumonda da Radiotelevisiun Svizra Rumantscha ha l'avat Vigeli Monn ditg il mardi avantmezdi, ch'el na veglia betg prender posiziun en chaussa.

audio
La glista cun propostas per in nov uvestg da Cuira va enavos a Roma
03:20 min, Actualitad dals 23.11.2020.
laschar ir. Durada: 03:20 minutas.

Papa decida

La glista cun ils trais candidats vegn uss returnada a Roma. Uschia che papa Francestg po ussa decider sez tgi che daventa nov uvestg a Cuira, senza prender resguard sin il chapitel catedral, scriva il portal kath.ch. Tenor l'agentura da novitads Keystone SDA èsi dentant er pussaivel ch'il papa preschenta ina nova glista cun trais candidats. Cura che in u l'auter da quai vegn a capitar, n'è però betg cler. Tenor l'infurmant pudess quai cuzzar in temp – fin Pasca u er anc pli ditg.

La sedia episcopala a Cuira è dapi il 2019 vacanta. Ella vegn il mument manada da l'uvestg transitoric Peter Bürcher.

Canonis avant l'inscunter en la curt

Il glindesdi enturn las 09:00 èn arrivads ils emprims canonis a Cuira. Sin dumonda, sch’ins possia quintar cun ina decisiun, n’ha dentant nagin dad els dà ina clera resposta. Ils blers dad els han fatg attent, ch’els na possian dir nagut. Durant las elecziuns d'in uvestg vala numnadamain l’obligaziun da mantegnair la discreziun.

Canoni?

Avrir la boxSerrar la box

Canonis èn las persunas ch'han l'incumbensa dad eleger in nov uvestg. Tenor il portal kath.ch èn quai per Cuira las suandantas persunas:

Cun sedia a Cuira:

  • Walter Niederberger
  • Martin Grichting
  • Joseph Maria Bonnemain
  • Gion-Luzi Bühler
  • Andreas Markus Fuchs

Senza sedia a Cuira:

  • Franz Stampfli, Turitg
  • Guido Schnellmann, Mühlethal
  • Martin Bürgi, Oberarth
  • Pius Venzin, Segnas
  • Tarcisi Venzin, Trun
  • Hans Mathis, Cazas
  • Peter Camenzind, Sviz
  • Daniel Durrer, Sachseln
  • Guido Auf der Mauer, Turitg
  • Andreas Rellstab, Turitg
  • Franz Imhof, Attinghausen
  • Peter Amgwerd, Turitg
  • Albert Fischer, Cuira
  • Alfred Cavelti, Glion
  • Rolf Reichle, Rheinau
  • Roland Graf, Unteriberg
  • Paul Schlienger, Stierva

In sguard istoric:

Ozendi observan cartents e medias cun attenziun l’elecziun d’in nov uvestg – quai dapi l'elecziun da Wolfgang Haas il 1988. Avant succediva quai en secretezza e quietezza. L'emprim material audiovisual davart in nov uvestg a Cuira datescha dal 1941. Ina retrospectiva dad otg decennis e tschintg uvestgs.

RTR novitads 06:00

Artitgels legids il pli savens

Scrollar a sanestra Scrollar a dretga