Ils 22 canonis sajan gnanc entrads en la debatta d'eleger in nov uvestg. Per la maioritad plitost conservativa na saja la glista, che Roma ha preschentà per la successiun da Vitus Huonder, betg stada acceptabla. Quai ha ditg in insider envers RTR. Er il «Tages-Anzeiger» ed il portal d'internet kath.ch avevan gia rapportà en quest senn.
Sin la glista che Roma ha preschentà, sajan stads trais nums. Els tuts valan sco spirituals plitost moderads.
- Vigeli Monn (avat da la claustra da Mustér)
- Joseph Bonnemain (uffizial da l'uvestgieu da Cuira)
- Mauro Giuseppe Lepori (avat general dals cisterziens a Roma)
Sin ina dumonda da Radiotelevisiun Svizra Rumantscha ha l'avat Vigeli Monn ditg il mardi avantmezdi, ch'el na veglia betg prender posiziun en chaussa.
Papa decida
La glista cun ils trais candidats vegn uss returnada a Roma. Uschia che papa Francestg po ussa decider sez tgi che daventa nov uvestg a Cuira, senza prender resguard sin il chapitel catedral, scriva il portal kath.ch. Tenor l'agentura da novitads Keystone SDA èsi dentant er pussaivel ch'il papa preschenta ina nova glista cun trais candidats. Cura che in u l'auter da quai vegn a capitar, n'è però betg cler. Tenor l'infurmant pudess quai cuzzar in temp – fin Pasca u er anc pli ditg.
La sedia episcopala a Cuira è dapi il 2019 vacanta. Ella vegn il mument manada da l'uvestg transitoric Peter Bürcher.
Canonis avant l'inscunter en la curt
Il glindesdi enturn las 09:00 èn arrivads ils emprims canonis a Cuira. Sin dumonda, sch’ins possia quintar cun ina decisiun, n’ha dentant nagin dad els dà ina clera resposta. Ils blers dad els han fatg attent, ch’els na possian dir nagut. Durant las elecziuns d'in uvestg vala numnadamain l’obligaziun da mantegnair la discreziun.
In sguard istoric:
Ozendi observan cartents e medias cun attenziun l’elecziun d’in nov uvestg – quai dapi l'elecziun da Wolfgang Haas il 1988. Avant succediva quai en secretezza e quietezza. L'emprim material audiovisual davart in nov uvestg a Cuira datescha dal 1941. Ina retrospectiva dad otg decennis e tschintg uvestgs.
