Tgi che vul laschar scurlattar a Cuira la chomma da saut sa tschenta per il pli en il Welschdörfli. Dentant en la giassa da bars, clubs ed etablissements n'è anc betg tut avert. Ils clubs da sautar per exempel han anc adina serrà lur portas. Il «Selig» scriva sin sia pagina d'internet: «Entant ch'ins dastga be avrir enfin mesanotg resta il club anc serrà». Probablamain vai cun el sco cun blers auters clubs en Svizra che han gia dà d'entellir lur opiniun en las medias: Avrir il club cun las reglas da la Confederaziun na rendia betg. Ins sto numnadamain serrar da mesanotg e mintga osp sto avair a disposiziun 4 meters quadrat spazi.
Ils beats vegnan ord las bars
Sch'ins va percunter sper las bars vi pulseschan ils beats or da l'isch quasi sco avant corona. Dentant cun guardar viaden ves'ins: Las bars sa tegnan vid las reglas da distanza, ils plaz da seser èn ordinads uschia ch'igl è avunda distanza tranter las sutgas ed èn spartids cun schibas da vaider ubain plastics. Er vegn controllà quantas persunas ch'èn mintgamai en la bar. Cun la distanza tranter ils osps avant la bar e sin via vesa quai dentant or auter. Nagin porta ina mascra d'igiena e cura che l'ura s'avanza envers mesanotg e cun mintga schluc dapli vegnan er las distanzas tranter la glieud pli e pli pitschnas.
Manaders da bars han quitads
Entant ch'ils hosps paran pia dad avair laschà ils quitads da corona a chasa avant ir en sortida èn ils manaders da las bars schon anc in zic gnervus. Johanna von Ott per exempel di: «Jau hai tema per mia bar, las entradas da dus mais mancan ed uss dastg'jau er be laschar en in quart dal dumber usità da persunas. Ils hosps èn bain grondius ed emprovan da sa gidar, dentant blers han er gì lavur curta ubain pers la plazza e ston uss guardar dals daners.»