Bitcoins èn daners ch’i dat mo en furma digitala – e betg en furma da munaida u bancnotas sco ils francs svizzers. L’anteriur schurnalist da finanzas, Marc Badertscher, ha ditg envers SRF che bitcoin haja in sumegliant caracter sco aur. I saja insatge per investir lien cun la speranza che la valur dal bitcoin creschia.
La finamira a lunga vista saja ch’ins possia era duvrar bitcoins en il mintgadi, per pajar per exempel il café en l’ustaria. Ma fin ussa na saja il program anc betg elavurà avunda ch’i rendess da pajar cun bitcoins, di l’expert.
Tge dovri per pajar cun bitcoins?
Per insumma pudair pajar cun bitcoins ston ins chargiar giu in'applicaziun sin il telefonin u computer. Quai è lura la bursa digitala. Chargiar bitcoins sin questa applicaziun saja bunamain dapertut pussibel, di Marc Badertscher. Per exempel tar ils automats da bigliets da la SBB.
La differenza
La gronda differenza tranter pajar cun bitcoins u cun francs svizzers saja la suandanta: Cura ch’ins paja cun francs svizzers è la banca tranter las duas persunas. La banca sa quant blers daners ch’ins ha sin banca e sch’ins ha avunda daners per transferir els.
Quai è tar il bitcoin auter. Enstagl che mo ina instanza ha la controlla – vegn lezza repartida sin massa persunas e computers per l'entir mund enturn. E quai numnian ins «blockchain», declera Marc Badertscher. Vinavant na san quellas persunas era betg tgi che stat davos tge pajament – cuntrari tar la banca.
Avantatgs e dischavantatgs
Ils avantatgs e dischavantatgs giaschian fitg datiers in da l'auter, di il redactur d'economia da SRF, Andreas Lüscher. Entant ch'ins sappia gudagnar fitg spert fitg blers daners – sappian ins exact uschè spert puspè perder els. Las investiziuns sajan colliadas cun in grond ristg, di l'expert.
Ins dovra blera gnerva sch'ins investescha en bitcoins.
Il curs ed uschia la valur dal bitcoin po sa midar fitg spert senza ch'ins sa daco, e quai munta ina gronda ristga. Vinavant dettia era fitg bleras attatgas da hackers sin il sistem. Per part saja gartegià als hackers d'engular bitcoins, ma Andreas Lüscher di che la segirtad dal program saja ils davos onns vegnida bler meglra.
