Il potenzial da spargnar è gronds tenor il guid da muntogna Martin Riedi. Cunzunt tar la maglia. Qua cusseglia il guid da prender cun sai nuschs ni era bastunets da graunins. Quels dettian spert energia e na paisian betg bler. Insumma na duai ins betg prender cun memia bler da magliar. Tut tenor la tura planisada dettia adina puspè pussaivladads da cumprar da magliar sin via, uschia ch’ins possia spargnar paisa en il satgados.
1,5 liters aua tanschan
Era da baiver na dovria betg ina massa. 1 enfin 1,5 liters per persuna tanschian normalmain, perquai ch’ins possia savens emplenir suenter la buttiglia cun aua frestga. I saja dentant da far attenziun e na betg simplamain prender aua ord dutgs ni lais per evitar malesser pervia d’aua contaminada.
Segir ina giacca da vent
Pertutgant resti cusseglia Martin Riedi da pachetar en il satgados resti da stgamiar ed ina giacca chauda, p.ex. ina leva giacca plimetta. Ina giacca betg per viandar, mabain ina per avair chaud sch’ins stoppia spetgar insanua in mument. Era ina giacca da plievgia è nizzaivla, betg mo encunter la plievgia, ma era sch’i sufla en lieus exponids.
Era ina pitschna apoteca cun plasters e faschadiras, crema da sulegl, egliers ed in chapè per sa proteger encunter ils radis da sulegl na dastgan betg mancar.
