Tgi duai succeder a Vitus Huonder?

L’uvestg Vitus Huonder polarisescha. L'onn proxim accumplescha el ses 75avel anniversari e cun quel duai ir a fin l’èra Huonder. Sche tut va tenor plan, vegn tschernì l'onn proxim in nov uvestg. Tgi pudess quai esser e co duess quel esser? Era in che polarisescha? Tge di il Corpus catholicum?

Vitus Huonder accumplescha proxim on ses 75 avel di da naschientscha. Bild in Lightbox öffnen.

Legenda da maletgs: Vitus Huonder accumplescha proxim on ses 75 avel di da naschientscha. Keystone

Schebain che l'uvestg Vitus Huonder è anc en uffizi han las discussiuns per ses successur gia ditg cumenzà. Tar il parlament catolic, il Corpus catholicum, sa bada che las discussiuns internas han survegnì fieu.

Sin la dumonda da dir insatge pertutgond l’uvestgieu a Cuira han ils blers ditg «Pli gugent di jau nagut, igl è in tema delicat». In per paucs han tuttina prendì posiziun.

«  In favurit vai jau betg. Ed era sche jau vess in na schess jau quai betg. Dentant aud’ins schon in ni l’auter num. »

Placi Berther
President da la cumissiun d'administraziun dal Corpus catholicum

Sursiglir cuntegn supplementar

Il «Corpus catholicum»

  • è l'autoritad suprema da la baselgia catolic-romana chantunala.
  • sa cumpona da 2 delegads da l'ordinariat episcopal, ils commembers da la Regenza e dal Cussegl grond ch'èn da confessiun catolic-romana e da 60 delegads dals cumins-baselgia (repartids en relaziun da la populaziun catolica sin circuls electorals).
  • sa raduna per regla ina giada ad onn.

Per tscherner in nov uvestg elegia il chapitel catedral ina persuna ord ina proposta da trais. Quella proposta da trais vegn da la Sontga Sedia a Roma, pia dal papa.Usitadamain sa basa quella porposta dal papa sin infurmaziuns ord l'uvestgieu en dumonda sez. Suenter l'elecziun dal nov uvestg entras il chapitel catedral po il papa lura confermar quel. Il chapitel catedral consista da 24 canonis.

Però causa che l’uvestgieu a Cuira ha adina puspè tgirà per lingias grassas, ha uss fatg il vicari general Martin Kopp la proposta da metter in uffizi in administratur apostolic empè dad in uvestg elegì dal chapitel catedral. Cun quai avess l’uvestgieu a Cuira ina regenza provisorica.

«  Sch’ins metta en in administratur apostolic vul quai dir che l'antecesseur n'ha betg fatg endretga sia lavur. E rinfatschar a l'uvestg Huonder ch'el haja fatg insatge fallà tenor dretg canonic na san ins betg. »

Placi Berther
President da la cumissiun d'administraziun dal Corpus catholicum

La finamira dad ina tala regenza provisorica fiss da quietar la situaziun actuala en l’uvestgieu. L’idea da l'administratur apostolic n'è dentant betg tant bainvisa tar il Corpus catholicum. Quietar la situaziun duess directamain il nov uvestg.

L'uvestg ideal

Tenor Placi Berther sto in uvestg avair bleras abilitads. El na sto betg mo esser in pastur e teolog, ma era avair abilitads dad in CEO dad ina firma. I duai esser ina persuna che ha ina abilitad dad ir e discurrer cun la glieud.

«  I stuess esser ina persuna ch'è pronta da tschertgar in equiliber tranter conservativ e liberal. Extrems n'èn mai buns. »

Lorenz Alig
Commember dal Corpus catholicum e deputà Cussegl grond

Il commember dal Corpus catholicum Aurelio Casanova sa giavischa in uvestg giuven. In uvestg che ha visiuns ed è abel dad inspirar la giuventetgna per la baselgia.

Sch'i dat proxim onn in nov uvestg u betg è anc avert. Cun ses 75avel anniversari è Vitus Huonder oblià da dar en la desditga a Roma. En cas usità vegn lura er tscherni in nov uvestg. Dentant ha igl era gia dat il cas, ch'il papa ha laschà en uffizi a l’in u l’auter uvestg era suenter il 75avel.