«I dat blers che vulan laschar anc in mument il corp dal defunct en stiva, cun avert l'isch e la fanestra per che l'olma haja peda da bandunar il corp», di Sefi Decurtins ch'è sepulider. El è persvadì ch'i dat insatge sco in'olma. Er il spiritual da l'ospital chantunal, Jörg Büchel, dovra in maletg per declerar, tge che l'olma pudess esser: «In pazient m'ha dumandà, nua che l'olma saja. Nus avain lura ensemen decidì che l'olma n'è betg insatge ch'ins vesa, mabain insatge ch'ins senta.»
Han er animals in'olma?
Els che s'enconuschan or bain cun l'olma dian, ch'er animals hajan in'olma, cunzunt animals da chasa. Dentant pli pitschen che l'animal saja e pli grev ch'i vegnia da s'imaginar in'olma en el. «Tar ina mustga è quai pli grev», di Decurtins, e tar plantas na datti per el nagina olma pli. Per Büchel percunter han bain mustgins sco er plantas ina sort «olma», e tut quellas olmas tutgan anc ina giada tar ina olma pli universala.
RR actualitad 07:00
