Siglir tar il cuntegn

Header

fg
Legenda: Tgira da confamgiliars a chasa Las opiniuns èn divididas. Keystone
cuntegn

Chantun Tgira da confamigliars a chasa

Tranter 4’000 e 6’000 persunas en il Grischun tgiran lur confamigliars a chasa en il temp liber. Quai per il pli senza grond sustegn dad ordvart. Il deputà dal cussegl grond, Marcus Caduff ha perquai pretendì en in’incumbensa a la regenza da meglierar quella situaziun. Uss ha la regenza dà resposta.

En la sessiun da favrer aveva il deputà Marcus Caduff surdà a la regenza l'incumbensa da ponderar megliuraziuns per persunas che tgiran lur confamigliars a chasa. Uss ha la regenza respundì. Ella vul sa tegnair vi dal plan d'acziun da la confederaziun. Quel cuntegn diversas propostas per megliurar la situaziun da persunas che tgiran lur confamigliars a chasa.

Agid finanzial direct manca

Per Marcus Caduff manca dentant in punct essenzial. L'agid finanzial direct. Tenor il plan d'acziun chantunal pon las organisaziuns da Spitex emploiar persunas che tgiran confamigliars a chasa ed uschia pajar quellas. La dretgira administrativa ha dentant decis che la Spitex n'è betg obligada da far quai. Per Caduff è perquai cler ch'ella na vegn er betg a far quai savens.

Plinavant pudess il chantun tenor Caduff spargnar blers raps cun pajaments directs a persunas che tgiran a chasa. Quai cun spargnar plazs staziunars en chasas da tgira. La regenza è qua dentant d'in auter avis e vul enstagl promover l’abitar en chasas cun servetschs da tgira (Betreutes Wohnen).

Las opiniuns èn divididas. Tuts vesan ch'igl è da far insatge dentant tar la dumonda co ed en tge furma, van ils mainis in ord l'auter. Il tema vegn uschia a fatschentar la politica grischuna ils proxims onns.

Artitgels legids il pli savens

Scrollar a sanestra Scrollar a dretga