Siglir tar il cuntegn

Header

Navigaziun

Purtret d'in colonna al Gottard.
Legenda: Colonnas vers il sid – colonnas vers il nord: Er questa Pasca il facit dal traffic sin las rutas da transit. Keystone
cuntegn

Traffic da Pasca Anc adina colonnas al Gottard

Anc la bun'ura aveva la polizia chantunala dal Tessin annunzià, ch'il traffic vers nord culia puspè.

  • Tranter Cazas e Rehanau stagnescha il traffic direcziun nord.
  • Tranter Mesocco-Nord ed il tunnel dal San Bernardino stagnescha il traffic vers nord.
  • Al Gottard hai il mument 9km colonna al portal dal sid.

Er quels ch'han spetgà fin il mardi per turnar dal sid n'han betg savì evitar da star en colonna: La polizia chantunala dal Tessin ha annunzià puspè l'avantmezdi 9 kilometers colonnas en il sid dal tunnel dal Gottard. Quai suenter che las ultimas colonnas eran pir sa schliadas la notg passada suenter las duas.

La fin d'emna sin las rutas da transit en km:

  • Il venderdi sontg – 15 km colonna vers il sid

Suenter la gievgia han blers automobilists gì er il venderdi sontg ina mala sort sin via en il sid. Fin a trais uras han els stuì spetgar davant il tunnel dal Gottard – fin sin 15 kilometers è la colonna creschida il suentermezdi.

Cun guntgir il Gottard, han ils automobilists era chaschunà colonnas sin l'autostrada A13 en direcziun San Bernardino. Sur uras èn ils autos stads airi tranter Cuira e Panaduz e per part er sin la via chantunala.

  • La sonda – 8 km vers il nord

Strusch che las colonnas en direcziun sid eran stadas schliadas stevan ils autos en colonna en tschella direcziun – en direcziun nord. Sonda suentermezdi era sa furmada ina colonna en direcziun nord cun ina lunghezza maximala da 8 kilometers. En il Grischun era il traffic sin l'autostrada A13 culà senza problems pli gronds.

  • La dumengia da Pasca – 10 km vers il nord

Pervi d'in vehichel da panna era il tunnel dal Gottard vegnì serrà en omaduas direcziuns. Per part avevi dà fin 10 kilometers colonna en direcziun nord cun quai ch'ina part da la glieud vuleva era sa messa sin via gia la dumengia vers chasa.

  • Il glindesdi da Pasca – 16 km e 15 km vers il nord

La lunghezza maximala che la colonna en direcziun nord aveva cuntanschì en il decurs dal di era 16 kilometers avant il tunnel dal Gottard – e 15 kilometers tras il Mesauc en direcziun San Bernardino.

RR novitads 06:0