Siglir tar il cuntegn

Header

Navigaziun

La porta davos dad iin transporter.
Legenda: En il Partenz, la Surselva ed en Tumleastga – la polizia ha controllà il glindesdi passà 60 transports dad animals (maletg simbolic). Keystone
cuntegn

Transports d'animals 60 transports controllads – 6 persunas denunziadas

... ha la polizia chantunala denunzià da 60 transports controllads 6 persunas per avair cuntrafatg a la lescha. Quai sajan ils resultads dad ina controlla da transports d'animals en il Partenz, la Surselva ed en Tumleastga, communitgescha la polizia.

Tar controllas da transports d'animals il glindesdi passà ha la polizia chantunala dal Grischun controllà radund 60 transports dad animals da niz. La gronda part da quels transports sajan vegnids fatgs tenor las prescripziuns.

Tuttina haja la polizia stuì denunziar a 6 persunas tar la procura publica grischuna – quai per esser en viadi cun transporters pauc u betg nettegiads, per betg avair cun sai ils documents necessaris u per betg avair respectà las chargias prescrittas.

Las controllas da la polizia chantunala sajan stadas part dad ina scolaziun dals spezialists interns per la protecziun d'animals, scriva la polizia. Uschia hajan ils spezialists er gist examinà e chattà per bun il transport dad ina vatga ferida.

En missiun per ils animals

Dapi radund 9 onns lavura radund in tozzel da collavuraturs e collavuraturas da la polizia chantunala sco er da quella da la citad da Cuira sco spezialistas u spezialists per la protecziun d'animals en Grischun. Questas persunas gidian a la polizia cun retschertgar ils fatgs e coordineschian las mesiras cun l'Uffizi per la segirezza da victualias e per la sanadad d’animals ALT, scriva la polizia chantunala en sia communicaziun.

RR novitads 16:00