Siglir tar il cuntegn

Header

cuntegn

Trends 2021 Moda – dapli che be vestgadira

En il mund da moda na datti betg bel u trid – gist u fauss.Tuttina datti reglas, ch'ins duess resguardar. Gronds designers n'han betg simplamain fatg collecziuns senza ponderar insatge.

Trends 2021

La moda sa sviluppa adina vinavant. Er quest onn datti chaussas che na duessan betg mancar en las stgaffas.

Las dunnas han questa stad puspè la schanza da purtar flurs. Flower power en tut las variaziuns è permess. Sin blusas, chautschas, rassas ni giaccas. Sche flurs embelleschan il vestgì è il toc en il trend. Sper il flower power ha era in auter trend in comeback: Las chautschas da trumbetta. Quellas chautschas fan ina bella figura ed èn in must-have il 2021 per mintga dunna moderna.

Era per ils umens datti quest onn novs trends. Per exempel la colur neon mellen. Tge ch'ins porta n'è betg impurtant. Igl è pussaivel d'aviar il neon mellen en ils chalzers, la giacca u il chapè. Tgi che na vul betg sa vestgir uschè marcant, po quest onn era esser modern cun in stil minimalistic. Simpels tagls e simplas colurs èn per ils umens era en il trend.

No-Go's

Cun sa vestgir duess ins resguardar insaquantas chaussas. Gusts èn gusts, dentant datti tuttina in pèr chaussas, ch'ins na duess propi betg far.

Ina rauba che dunnas na duessan betg far: Chautschas-chaltschiel en colur da pel. Na vesa betg ora bain e fa endament soccas da cumpressiun.

In sbagl che blers umens fan: Maschadar las colurs da tschinta e chalzers. Tschinta e chalzers han adina d'avair la medema colur.

Designers che han influenzà la moda

Designers datti dapli che avunda. Ils ins han fatg gronda carriera, han lur atgnas firmas e mintgin enconuscha il num. Auters èn pli pitschens ed han forsa mo singulas collecziuns betg uschè impurtantas. Ma er ils gronds han cumenzà pitschen. Uschia er Coco Chanel, che ha procurà per l'acceptanza da la dunna cun chautschas, Christian Dior che ha suenter la Segunda Guerra mundiala fatg la moda puspè eleganta, Yves Saint Laurent in designer che ha pir suenter problems da drogas chattà la via tar la haute couture, Gianni Versace promotur da la moda homoerotica u er Karl Lagerfeld che ha fatg or d'ina simpla chamischa alva in statement da moda.

Corona e la moda

Er la moda è vegnida fermamain influenzada da la pandemia da corona. Per l'ina n'èn las shows betg stadas uschè extravagantas sco ils ultims onns. Per l'autra na vul ins betg pli cumprar moda da saira. Il desideri da moda patgifica per star a chasa è creschì pervi da la pandemia. Ma er suenter la pandemia vegn Covid-19 anc ad aviar influenza sin las novas collecziuns. Experts spetgan ina renaschientscha dals «golden 20's».

Upcycling

Upcycling è in nov trend en la scena da moda. En quest trend prend'ins tocs da moda vegls e transfurmescha els en insatge nov e modern. Per exempel pon ins dar colur a vegls chalzers. In'autra pussaivladad è da cuser sin ina giacca novs buttuns che dattan en egl. Spert han ins ina nova giacca. Il trend da upcycling è bun per la bursa e per la natira.

RTR actualitad 10:30

Artitgels legids il pli savens

Scrollar a sanestra Scrollar a dretga