La vischnanca aveva dà la lubientscha il november 2012. Helvetia Nostra ed ina persuna privata han fatg recurs. Pervia dal gea a l’iniziativa cunter abitaziuns da vacanzas è la procedura avant la dretgira administrativa vegnida sistida.
Durant la sistida ha la firma d'immobiglias inoltrà midadas e fatg valair ch’i sa tractia dad abitaziuns turisticas explotadas. Talas abitaziuns na dastga betg esser drizzadas en sulet per ils basegns dals proprietaris, mabain ston esser adattadas per dar a fit. Plinavant èsi perscrit ch’ellas vegnan dadas a fit sur onn d’in hotel e ch’ils hosps en las abitaziuns pon nizzegiar l’infrastructura da l'hotel.
Tant la vischnanca da Bravuogn sco era la dretgira administrativa chantunala han considerà il 2017 resp. il 2019 che questas premissas sajan ademplidas.
Betg vardaivel e persvadent
En sia sentenzia gist publitgada s’exprima il Tribunal federal a moda cuntraria: Il project cun las duas chasas a Bravuogn saja memia pitschen per abitaziuns explotadas. I manchia era indicaziuns concretas che mussian a moda vardaivla ch’i sa tractia propi d'abitaziuns turisticas explotadas e ch'ellas na vegnian lura betg tuttina nizzegiadas sco normalas abitaziuns da vacanzas.
Il Tribunal federal annullescha tant la lubientscha da bajegiar da Bravuogn sco era la decisiun da la dretgira administrativa grischuna.
