Siglir tar il cuntegn

Header

Video
Cartel da construcziun: Il chantun na survegn betg invista en las actas da la WEKO
Or da Telesguard dals 05.11.2019.
laschar ir
cuntegn

Tribunal administrativ federal Chantun Grischun na survegn nagin'invista en las actas da la WEKO

Il Tribunal administrativ federal ha refusà il recurs dal Chantun Grischun. La Cumissiun da concurrenza WEKO haja agì endretg cun refusar al chantun l'invista en ils documents, che stattan en connex cun il cartel da construcziun en Val Müstair. La decisiun da refusar l'invista saja confurm a la lescha federala da protecziun da datas.

Vinavant argumentescha il tribunal cun consequenzas negativas per la pratica. Ad Interpresas che sa denunzieschan sez concedan ins en in tschert rom la protecziun da lur datas. Sch'il chantun avess survegnì invista cumpletta, vegniss l'auto-denunzia en futur nunattractiva. Quai vul il Tribunal administrativ federal evitar.

Tge è capità?

La stad 2017 ha la Cumissiun da concurrenza WEKO publitgà l'emprima sentenzia en connex cun il cartel da construcziun da la Val Müstair. Els han fatg cunvegnas da pretsch illegalas en sur 100 cas tranter l'onn 2004 e 2012. Sinaquai ha il Chantun Grischun dumandà la WEKO per invista en tut ils documents. Quai per chattar or, sch'er il chantun è pertutgà.

La WEKO n'ha dentant betg vulì mussar tut ils documents. Cunter quella decisiun ha il chantun inoltrà recurs tar il Tribunal administrativ federal.

Reacziun dal chantun

Sco ch'il cusseglier guvernativ Mario Cavigelli ha ditg envers RTR, na saja quella decisiun betg ina surpraisa. Ins stoppia uss dentant analisar la decisiun e ponderar ils proxims pass. Il chantun po anc trair vinavant la decisiun dal Tribunal administrativ federal ed ir davant il Tribunal federal a Losanna. Per inoltrar il recurs han els temp 30 dis.

RR novitads 12:00