L’accident era capità il november 2017. Durant allontanar roma e plantas sper ina lingia da current electric, era in lavurer crudà 10 meters en la profunditad. El aveva – senza vulair - resgià atras la suga da segirtad cun la resgia a motor.
Responsabladad dal patrun?
Suenter che la procura publica ha constatà ch’il lavurer aveva fatg las scolaziuns necessarias pertutgant segirtad al plaz da lavur ed era examinà che la suga era stada en urden, ha ella disponì il november 2019 da betg persequitar vinavant la procedura penala.
Il lavurer e sia dunna han recurrì. La dretgira chantunala ha dentant dà raschun a la procura publica. Il pèr ha tratg vinavant il cas al tribunal federal.
Ils derschaders da Losanna crititgeschan en ina sentenzia publitgada quest’emna ch’ins haja tralaschà d’intercurir, sch’il patrun haja controllà ed insistì che ses lavurers resguardian propi bain avunda las mesiras da segirezza.
La procura publica sto uss cuntinuar las examinaziuns. Dapi l’accident cun grevas blessuras al chau, na po l’um betg pli lavurar ed è inabel da giuditgar.