Siglir tar il cuntegn

Header

cuntegn

Tribunal federal Iniziativa per ina chatscha etica è dal tut valaivla

Suenter in lung proceder han ils iniziats da «l'iniziativa per ina chatscha etica e cumpatibla cun la natira» survegnì raschun. En il davos punct da l'iniziativa – che valeva anc sco per part nunvalaivel – ha il Tribunal federal dà glisch verda. Uschia è uss l'entira iniziativa valaivla.

Il Tribunal federal da Losanna ha gì da tractar be il punct tschintg en l'iniziativa. Quel pretenda che l'Uffizi da chatscha e pestga dal Grischun sco er la cumissiun da chatscha stoppian esser represchentads da moda paritetica da protecturs d'animals/chatschaders sco era da betg chatschaders. En sia sentenzia ha il Tribunal federal declerà quel sco valaivel. Quai cuntrari a la Dretgira administrativa dal Grischun, lezza aveva decidì che quest punct saja per part nunvalaivel.

Cunquai che er questa ultima da 9 pretensiuns è valaivla, è uss la cumpletta iniziativa valaivla. Uschia che Grischunas e Grischuns pon votar davart quella.

audio
L'iniziativa per ina chatscha etica po vegnir davant il pievel
ord Novitads dals 06.05.2020.
laschar ir. Durada: 4 minutas 48 Secundas.

Da Cuira enfin a Losanna

Quai è dentant stà ina lunga via. Ils iniziants han suenter che l'iniziativa è vegnida tractada en il Cussegl grond fatg dus recurs: In emprim recurs tar la Dretgira administrativa chantunala suenter ch'il parlament aveva declerà trais puncts sco nunvalaivels u per part nunvalaivels. Pli tard hai anc dà anc in segund recurs tar il Tribunal federal a Losanna.

Zic a zic èn ils en tut nov puncts da l'iniziativa lura vegnids declerads sco valaivels:

Ils 9 puncts da l'iniziativa cun las decisiuns da parlament, Dretgira administrativa e Tribunal federal.
Legenda: Ils puncts blaus simboliseschan glisch verda, ils cotschens muntan che l'instanza ha declerà quests sco nunvalaivels u per be per part valaivels. RTR

Ina lunga istorgia

L'entschatta prenda l'istorgia l'avust 2014. Lura inoltreschan ils iniziants enturn la presidenta da l'uniun «Wildtierschutz Schweiz» Marion Theus l'iniziativa cun 3'250 suttascripziuns valaivlas.

Tge è capità cura?

Avrir la box Serrar la box
  • 26-08-2014: inoltrà iniziativa
  • 17-10-2016: Cussegl grond declera iniziativa per part sco nunvalaivla
  • 09-11-2016: recurs tar Dretgira administrativa dal Grischun
  • 26-06-2018: Dretgira administrativa approvescha per part il recurs
  • 01-10-2018: recurs tar Tribunal federal
  • 06-05-2020: Tribunal federal approvescha recurs

Enavos en il Cussegl grond

Suenter la sentenzia dal Tribunal federal è la balla puspè tar il Cussegl grond. Sco Mario Cavigelli, cusseglier guvernativ responsabel ha detg, giaja el da quai anora che la regenza suttamettia in messadi supplementar al Cussegl grond. Quai messadi pertutgia ils trais puncts ch'il parlament aveva declerà sco betg valaivels. Cun ina votaziun a l'urna fa Cavigelli quint en la segunda mesadad dal 2021.

RTR novitads 12:00

Artitgels legids il pli savens