Siglir tar il cuntegn
Inhalt

Chantun Tschajera spessa per pendicularas dal Grischun

L’enviern passà n’è betg stà in fritgaivel per il turissem d’enviern en il Grischun - quai era previsibel. Il monitoring da las pendicularas grischunas mussa dentant anc in mender maletg: L'enviern 2015/16 è stà il pli nausch dals ultims 15 onns.

Ina pendiculara en la tschajera.
Legenda: Admoniziun da las pendicularas grischunas: I n’è betg da tralaschar las renovaziuns necessarias e las investiziuns per remplazzar l’infrastructura. Keystone

En cifras munta il nausch resultat che bun 400’000 giasts damain han visità il Grischun l’ultima stagiun. Cumpareglià cun la stagiun d’enviern 2014/15 han las pendicularas uschia stuì nudar in minus da 6,9%. Cumpareglià cun las medias dals ultims 5 onns schizunt in minus da 10,6%. Quai resulta dal monitoring da las pendicularas grischunas.

Engiadin'Ota ha patì il pli fitg

La pli gronda reducziun nodan las pendicularas da l'Engiadin'Ota cun prest 9% damain giasts. Ils retgavs dal sectur da gastronomia èn sa reducids per 6%.

Er la svieuta da transport è sa reducida en cumparegliaziun cun l’onn avant per passa 10%, en cumparegliaziun sur 5 onns per radund 12%. Quai munta ina reducziun da las svieutas per circa 21 milliuns francs.

Las pendicularas han surtut gì da cumbatter cun las capriolas da l'aura ed il ferm franc.

Mantegnair e meglierar il status quo

Ord vista da las pendicularas dal Grischun haja l’enviern passà mussà

  • ch’igl è impurtant d’ennavar las pistas, perquai ch’ils giasts vegnian en il Grischun per l’offerta da sport d’enviern e betg per il program alternativ
  • ch’il maun public sto gidar a meglierar ed optimar las cundiziuns per la branscha, per exempel cun deregulaziuns, reducziuns da taxas e taglias e proceduras pli effizientas

RR novitads 12:00