Giasts da l’exteriur pon far vacanzas en Svizra questa stad – almain quels da la Germania, da l’Austria u da la Frantscha. Ils ministers da quels pajais han fatg a savair ier l’avertura dals cunfins. Per il turissem en il Grischun è quai ina nova situaziun da partenza.
Il turissem viva dal liber viagiar.
Ma la buna nova ha era sia vart sumbrivauna. Ils Svizzers pon numnadamain era ir en l'exteriur – «ina concurrenz'augmentada», di Martin Vincenz.
Grischun Vacanzas adatteschia uss in pau sia strategia e fetschia reclama era en la Germania ed en l'Austria. Ma il focus restia vinavant tar ils giasts svizzers. Lezs sajan decisivs per la stagiun da stad e d'atun.
Ina stad normala van duas terzas dals Svizzers en l’exteriur – noss osps potenzials.
Grischun Vacanzas carmala pia Svizzers, Tudestgs ed Austriacs en il chantun. N'exista betg il privel ch'i dat fullas u gronds chatschs ch'ins less evitar en temps da corona?
Gliez saja la sfida da mintga branscha suenter l’avertura, di il schef da Grischun Vacanzas. Per evitar infecziuns stoppian ins sa tegnair vi dals concepts che mintga branscha elavuria. Sch’ils osps vesian ch’els sajan segirs e sa sentian bain en ils hotels u en las pendicularas, stgaffeschia quai fidanza.
Osps che sa sentan bain e segirs, turnan l'enviern.