Dapi il segund pass da la reavertura cun stizuns ed ustarias ils 11 da matg, haja quai dà en il Grischun be tschintg novs cas da corona. La media chantunala interpretescha quai uschia che las mesiras da protecziun, cunzunt da tegnair distanza, lavar e dischinfectar ils mauns funcziunian.
En vista ad ina segunda unda concluda ella perquai:
Sin basa da l'ultim mais, betg mo en il Grischun ma er en l'entira Svizra, stoss jau dir: Na, jau crai betg ch'ella vegnia uschè gonda sco quai ch'ella è stada l'ultima giada.
Ma quai gartegia be sche tschertas mesiras vegnian resguardadas vinavant. Principalmain sajan quai la distanza e l'igiena. Ed ella fa er attent ch'i saja tar tut anc adina in nov virus ch'ins n'enconuschian anc betg dal tuttafatg.
Ulteriur lockdown betg necessari
Marina Jamnicki na vesa betg ch'i dovria anc ina giada mesiras uschè drasticas sco il mars. Quai er sch'i avess tuttina da dar ina ferma segunda unda d'infecziuns. D'ina vart veglian tuts evitar quai sche pussaivel. Da l'autra vart na saja quai er ord vista medicinala probablamain betg pli necessari. Ussa possian ins vesair bler meglier ordavant ils svilups ed uschia er reagir pli punctual tar persunas pertutgadas e lur conturn. Plinavant è ella da l'avis che er ils ospitals sajan uss preparads bler meglier che cura ch'il virus è arrivà per l'emprima giada.
Scolas avertas nagin problem
En las duas emnas che las scolas sajan uss puspè avertas n'haja quai dà nagins cas d'infecziun, uschia la media chantunala. Cunquai ch'i dettia actualmain er uschiglio fitg paucas infecziuns, saja il ristg ch'in uffant s'infecteschia cun il virus, fitg pitschen. Tenor ella na stoppian ins betg far quitads pertutgant la scola sco pussaivel lieu da derasaziun. Quai funcziunia uschia cun las mesiras instradadas.
Er il stab da crisa turna plaunet tar la normalitad
Sin il zenit da la crisa hajan els telefonà per part passa trais giadas l'emna in cun l'auter. Entant hajan els reducì ils inscunters via telefon sin in per emnas. I saja bun da tuttina anc sa barattar regularmain.
Il mument hajan els anc lavur avunda. Il contact-tracing, pia tschertgar persunas che pudessan esser stadas en contact cun eventuals cas da corona dettia bain lavur, ma funcziunia sco spetgà. I na saja betg extrem blers cas. Uschia sajan els uss er vi da discussiunar da schliar il manaschi da crisa. Ina decisiun na saja però anc betg crudada. Quai dependia er in pau da la Confederaziun, uschia Marina Jamnicki. Ma ins sentia che la normalitad returnia plaunet.