Siglir tar il cuntegn

Header

video
Ils chatschaders fan reclama per lur chaussa
Or da Telesguard dals 22.08.2017.
laschar ir. Durada: 2 minutas 31 Secundas.
cuntegn

Chantun Turnea cun in post mobil – ils chatschaders grischuns fan reclama

Cun in char d'exposiziun che duai servir sco pitschen museum da natira vul l'Uniun grischuna dals chatschaders da patenta far reclama per la chatscha. Da quel intent e dad ulteriuras sfidas per la chatscha grischuna ha l'Uniun orientà in mardi a Haldenstein.

A sia infurmaziun da medias ha accentuà l'Uniun grischuna da chatschaders da patenta, ch'ils radund 5'500 chatschaders prestian cun lur lavur da tgira voluntaria sur onn in servetsch a la publicitad ed a la biodiversitad.

Enpli vegnia la patenta da chatscha grischuna sulettamain surdada suenter ch’il certificat da cumprova da sajettar saja avant maun – quai che garanteschia ch’ils chatschaders sajan preparads bain per la chatscha.

Meglierar l'image da la chatscha

audio
Saira: Perche fan ils chatschaders ina campagna d’image?
ord Actualitad dals 22.08.2017.
laschar ir. Durada: 1 minuta 47 Secundas.

En ils davos onns saja la chatscha grischuna adina puspè vegnida crititgada publicamain. Tenor l’Uniun grischuna dals chatschaders da patenta dovri perquai ina campagna per posiziunar la chatscha en la dretga glisch, manegia vicepresident Tarzisius Caviezel.

Bleras persunas emblidan tenor el, ch'ils chatschaders fan durant l’entir onn blera lavur pigl ambient. Els na veglian betg vegnir mesirai be vi da quai, che na funcziuna betg correctamain – numnadamain pervi da paucas nursas nairas, che san betg co ir enturn cun la buis u che baivan memia bler alcohol.

Declerar ed infurmar: Tras contact real e virtual

Per puspè purtar la chatscha pli manaivel a la populaziun datti ussa in char d'exposiziun che daventa in pitschen museum da la natira. Quel duai mussar a giuven e vegl, che la chatscha saja in basegn, di l'uniun.

Er sin facebook vulan ils chatschaders da patenta tschertgar il contact direct. Plinavant ha l'Uniun grischuna dals chatschaders da patenta lantschà ina concurrenza da fotografia.

RR novitads 12:00+

Artitgels legids il pli savens