Emprima iniziativa na fiss forsa betg stada valaivla
Il temp da rimnar suttascripziuns per l’emprima iniziativa è scrudada l'emprim d’october, in onn suenter ch’ins ha lantschà quell'iniziativa. Dentant gia curt suenter che la gruppaziun ha lantschà l’iniziativa han els dà si quella ed inoltrà in'iniziativa surlavurada.
Dubis giuridics han tenor la gruppa d'iniziants manà ch’ins n'haja betg pli persequità l’emprima iniziativa. Per betg ristgar d’avair la fin finala in’iniziativa betg valaivla han els uschia decidì da far in'iniziativa dubla. Quella è dentant pir vegnida lantschada l'avrigl 2016. Il temps per rimnar suttascripziuns cuzza uschia enfin l'avrigl 2017. Tenor Marlies Klesse da la gruppa d’iniziants haja la chanzlia chantunala da quella giada ditg ch’ins na stoppia betg annullar la veglia iniziativa, quella scrodia automaticamain suenter in onn. Quai è ussa pia capità.
Annunziar la scrudada da l’iniziativa pro forma
Tenor la chanzlia chantunala Grischuna hajan ins stuì communitgar che l’iniziativa saja scrudada. La gruppa d'iniziants conferma dentant che l'iniziativa actuala saja sin buna via. I saja gia vegnì rimnà 3'500 suttascripziuns, uschia Mark Niederdorfer. Malgrà che mo 3’000 suttascripziuns fissan necessarias vul la gruppa anc rimnar en las proximas emnas ulteriuras suttascripziuns per far la segira. L’idea saja da pudair inoltrar las suttascripziuns la fin d'october 2016.
RR novitads 8:00