Tut il sa dustar n'ha gidà nagut

La Dretgira administrativa dal Grischun oblighescha la citad da Cuira da surpigliar ils custs da transport per ils uffants che visitan la scolina bilingua rumantsch-tudestga a Cuira.

Laschar ir video «Cuira ha da pajar per il bus da la scolina rumantscha – ina decisiun e sias consequenzas»

Cuira ha da pajar per il bus da la scolina rumantscha – ina de...

2:22 min, Telesguard dals 3.2.2016

Enfin ussa aveva l'Uniun da scolina Cuira organisà il transport d'uffants sin agen custs. Vul dir: Ils geniturs avevan ensemen cun sponsurs privats finanzià ils transports. La citad da Cuira aveva refusà da sa participar als custs annuals da 20’000 francs. Quai malgrà ch'ils uffants pertutgads èn domiciliads en l'entir territori da la citad e na pon betg ir sulets la via a scolina. Quai pervi che la via è memia lunga ni memia malsegira.

La dretgira administrativa dal chantun Grischun ha ussa dentant decidì ch'era la scolina bilingua fetschia part da la scola populara e che la visita da quella stoppia esser gratuita.

Custs da transport per la scolina rumantscha èn daventads memia auts

Ils custs annuals da transport per la scolina rumantscha a Cuira eran ils davos onns tar 20’000 francs. Quels custs han ins pajà cun las contribuziuns annualas da 450 francs ch'ils geniturs han stuì pajar per mintga uffant. Per vegnir sin ils 20’000 francs ha i anc duvrà il sustegn da sponsurs.

Flavia Buchli, presidenta da l’Uniun da scolina Cuira, è levgiada che la dretgira administrativa dal Grischun ha dat dretg a la scolina rumantscha. Avrir maletg en lightbox.

Legenda da maletgs: la presidenta da la scolina rumantscha Flavia Buchli RTR/ GMM

«  Senza sponsurs generus na fiss il transport dals uffants da la scolina rumantscha betg pli stà pussibel. »

Flavia Buchli
presidenta Uniun da scolina Cuira

Ina gronda sfida finanziala è stada il nov bus da scola. Avant in onn e mez è rut il vegl bus da la scolina ed uschia han ins stuì cumprar in bus d’occasiun. Per pudair pajar ils 38’000 francs han ins stuì far debits pervi che la citad da Cuira na vuleva betg sa participar als custs da transport. Cun quai che l’Uniun da Scolina da Cuira n'è finanzialmain betg fitg ferma, èn els ids cun la dumonda da finanziaziun da traffic avant la dretgira administrativa dal Grischun. Quella ha ussa dà raschun a l’Uniun da Scolina da Cuira. La dretgira administrativa dal Grischun oblighescha la citad da Cuira da surpigliar ils custs da transport per ils uffants da la scolina bilingua.

Tenor la cussegliera da cità Doris Caviezel-Hidber pertutga la decisiun a radund 300 scolars a Cuira. Per quels han ins ussa da chattar ina soluziun tar il transport da scola Avrir maletg en lightbox.

Legenda da maletgs: cussegliera da cità Doris Caviezel-Hidber RTR/ GMM

«  La situaziun è sclerida. Nus savain ussa tge che vala. »

Doris Caviezel-Hidber
cussegliera da citad Cuira

Emprims quints prevesan custs da 50’000 enfin 60’000 francs

Questa decisiun da la dretgira administrativa dal Grischun na vala ussa betg mo per la scolina rumantscha, mabain era per tut las autras scolas e scolinas bilinguas. Tenor la cussegliera da citad Doris Caviezel-Hidber pertutga quai radund 300 scolars. Per quels han ins ussa da chattar ina soluziun. Tenor emprims calculaziuns fa la citad quint cun custs da 50’000 enfin 60’000 francs. 28% da quels custs surprenda il chantun, il rest ha la citad da Cuira da pajar.

Traffic public sco opziun enstagl dal bus spezial

Cler è: La citad da Cuira ha da surprender ils custs da transport per uffants che han in viadi memia lung ni memia malsegir. Dentant anc betg cler è co ch’els han da far quai. Segir na vegni betg a dar per tut ils uffants bus spezials. Scolars vegnan pli probabel survegnir in bigliet per il bus da Cuira. Tar ils uffants da scolina n'è quai betg uschè simpel. Tar quels uffants n'è anc betg cler en tge cas ch'il transport cun il traffic public è supportabel u tge che fissan alternativas. La citad da Cuira vegn ussa ad analisar la situaziun e preparar in pèr pussaivladads. Suenter vegn ins a tschertgar il contact cun las differentas uniuns e scolas pertutgadas. Quai è dentant anc musica da futur.

RR novitads 10:00