Tuts duain pajar tuttina bler per fugitivs minorens

Cur che requirents d'asil minorens han survegnì da la Confederaziun ina resposta positiva sin lur damonda d'asil, è la vischnanca responsabla per il sustegn dals giuvenils. Per vischnancas cun blers fugitivs munta quai dapli custs, per autras damain. Uss duai quai esser per tuts tuttina.

En scola: ina gruppa fugitivs minorens senza accumpagnament. Bild in Lightbox öffnen.

Legenda da maletgs: fugitivs minorens Fugitivs minorens vegnan magari senza accumpagnament e dovran bler schurmetg e sustegn. keystone

I saja fair da reparter ils custs per la tgira ed il sustegn da fugitivs minorens senza accumpagnament, che sajan vegnids renconuschids, sin tut las vischnancas dal Grischun - quai è stà il tenor da las deputadas ed ils deputads dal Cussegl grond. Perquai ha el decidì unanimamain cun 116 vuschs d'agiuntar in artitgel en la lescha per il sustegniment da persunas basegnusas.

Reparter ils custs sin tuts

Quai vul dir che vischnancas cun blers fugitivs survegnan levgiament e na ston betg pli surpigliar tut ils custs. Vischnancas senza fugitivs perencunter pajan ina cumpart ord solidaritad. La nova finanziaziun saja pli faira e nagina vischnanca vegnia uschia surchargiada, garantescha il cusseglier guvernativ responsabel Jon Domenic Parolini. Entras questa gulivaziun sajan las vischnancas numnadamain protegidas e mintga vischnanca stoppia mo pajar tenor il dumber dals abitants.

Cun ils custs supplementars èsi da quintar davent da l'onn 2017, lura va la lescha cun l'artitgel revedì en vigur.

RR novitads 16:00