Siglir tar il cuntegn

Header

Screenshot da la nova applicaziun.
Legenda: Screenshot da la nova applicaziun. MAD
cuntegn

Uffizi da chatscha e pestga Nov sistem d'infurmaziun davart il luf

Dapi l'entschatta dal mais registrescha la surveglianza da chatscha grischuna observaziuns da lufs ed auters animals da rapina gronds cun agid d'ina nova app. Las registraziuns vegnan tramessas ed evaluadas en in lieu central. Uschia saja pussaivel d'avertir svelt possessuras e possessurs d'animals da niz e d'observar detagliadamain la situaziun, communitgescha l'Uffizi da chatscha e pestga.

Il nov sistem è accessibel a la publicitad

Sin ina nova pagina d'internet da l'UCP è publitgada ina charta, la quala mussa tut las observaziuns d'animals da rapina gronds tenor spezia d'animals inclusiv las datas respectivas. Las observaziuns vegnan preschentadas cun puncts. Pli nova che l'observaziun è, e pli stgir ch'il punct respectiv è. Igl è previs da meglierar cuntinuadamain la pagina e d'agiuntar infurmaziuns e funcziuns. Plinavant pon tut ils cas d'animals da niz stgarpads dapi il 1. da zercladur 2020 vegnir consultads sco annunzias sin la pagina da l'uffizi.

Lufs bler pli activs

Actualmain sa concentreschia l'interess sin ils eveniments cun lufs. En Surselva èn actualmain gist trais trieps activs. Quai èn il triep dal Beverin, il triep dal Piz Bargias ed il triep da Val Gronda.

Ins ha constatà che differents lufs singuls surmuntan resp. sursiglian las mesiras da protecziun sco saivs electricas e chauns da protecziun da muntaneras da las possessuras e dals possessurs d'animals e mussan pia in cumportament fitg problematic. Victimas dals lufs èn stadas fin ussa cunzunt nursas resp. agnels e chauras. Dentant er tar scossas da vatgas-mamma han las puras ed ils purs constatà l'ultim temp midadas dal cumportament.

RTR novitads 10:00