Cun 65 onns va Paul Schwendener suenter passa trais decennis a la testa da l'Uffizi chantunal d'industria, mastergn e lavur en pensiun. L'onn 1988 aveva el surpiglià il post ed ha dapi lura manà l'uffizi. I saja stà blera lavur d'organisaziun e svilup. Gronds temas sco la contingentaziun da lavurers esters fin dals onns 80, la dischoccupaziun creschenta ils onns 90 u ils contracts bilaterals l'onn 2002 han accumpagnà Schwendener tar sia lavur. Il temp il pli turbulent saja dentant stà la fin da sia carriera:
Uschia sco cun corona, cun 52'000 luvrerAs pertutgadAs en il Grischun, n'essan nus durant mes entir temp mai vegnids surprendids.
La pandemia tegna dentant vinavant en flad l'uffizi chantunal. Las cifras da dischoccupaziun èn bain sa sbassadas, dentant anc adina sin in nivel detg aut. Quels quitads ha Schwendener uss surdà a ses successur.
Gian Reto Caduff da nov al timun
L'um da 43 onns è oriund da Paspels. El è gia stà trais onns il substitut da Schwendener ed enconuscha uschia bain il manaschi quotidian. Ina caracteristica da ses ex-schef vuless el gugent surpigliar:
El ha adina pruvà da porscher bunas cundiziuns per l'economia e medemamain esser in bun servetsch per persunas dischoccupadas.
En general na vul el betg metter sin il chau l'uffizi, mabain cuntinuar cun la lavur fatga da Schwendener. Sia nova incumbensa ha Caduff cumenzà l'entschatta dal mais da settember. Tge ch'è er anc gist vegnì vitiers è in nov lieu da lavur. L'Uffizi chantunal d'industria, mastergn e lavur ha midà chasa: ord differents edifizis a Cuira en il nov bajetg Sinergia. Quai saja era ina schanza ch'ils 150 collavuraturs e collavuraturas lavurian anc pli fitg ensemen che fin qua.