Chantal Marti-Müller daventa nova manadra da l'Uffizi chantunal per la scola populara e sport. Il prim da matg 2020 surpiglia ella il post da Dany Bazzell che va en pensiun scriva il Departament d'educaziun. Marti-Müller ha 47 onns ed è actualmain prorectura a la Scola auta da pedagogia dal Grischun. Dapi il 2004 lavura ella a la Scola auta da pedagogia sco docenta da sport, sco pedagoga cun accent didactica ed en la perscrutaziun. Ella discurra tudestg e rumantsch.
Servetsch da l'uffizi per scola populara e sport
En il sectur da la scola procura l'Uffizi per la scola populara ed il sport ch'ils fatgs da las scolinas, da las scolas popularas e da las scolas spezialas en il chantun Grischun vegnian manads e promovids en il senn da las leschas correspundentas. En il sectur dal sport intimescha l'uffizi la populaziun, en spezial ils giuvenils – cun purschidas da sport en las scolas ed en las uniuns da sport – d'esser activs corporalmain, da viver en moda sauna e da s'integrar socialmain. Plinavant garantescha l'uffizi la coordinaziun tranter las persunas e las instituziuns ch'èn activas en il sport.
RR novitads 15:00