In tema è ella gia dapi decennis, la depopulaziun. Propi IL recept per franar ella na datti dentant betg. Tenor Michael Caflisch da l'uffizi per economia e turissem datti tuttina mesiras ch'in e scadin pon prender. Tenor el na pendia quai numnadamain betg vid il chantun e las vischnancas. Mabain savens vid chaus, chaus innovativs, magari er chaus sturns. Chaus che realiseschan ideas, fundeschan fatschentas, mettan en moviment insatge. E cura ch'igl è mess en moviment ina giada il crap, lura è il pli impurtant pass fatg.
In recept che funcziuna per tuts na datti
Dentant er qua na pon ins betg simplamain dir: Quai è il recept! Fundar ina fatschenta cun plazzas da lavur e bun èsi. Anzi, i dependia dad uschè blers facturs, uschia Michael Caflisch. Per exempel dependia quai er da bun spazi per abitar. Sch'i n'ha betg abitaziuns attractivas u bunas cundiziuns per cumprar u bajegiar na gidian er las plazzas da lavur nagut.
I dovria in entir pachet per carmalar la glieud en ina vischnanca. Quai pachet guarda dentant per mintga vischnanca or auter. Per Sumvitg pon tschertas mesiras funcziunar grondius, per la Bregaglia dovri dentant autras mesiras. Per chattar or tge mesiras ch'i dovra stoppian las regiuns e vischnancas sa dumandar: Tgi essan nus? Tge pudain nus far? En tge direcziun vulain nus ir? Cura che quellas dumondas èn respundidas, lura pon ins far in plan. Dentant tgi che quai «ins» è, quai saja lura er anc da sclerir.
RR actualitad 12:00