Uffizi per natira ed ambient resta tar Jäger

Il Cussegl grond ha discutà in'incumbensa che vuleva che la regenza ponderescha da metter l'Uffizi per ambient e natira en il departament per economia. Il Cussegl grond ha detg cun 54 tar 53 vuschs che l'uffizi duai restar en il departament per la protecziun da l'ambient.

In portrait. Bild in Lightbox öffnen.

Legenda da maletgs: Il cusseglier guvernativ Martin Jäger (PS). RTR

L'incumbensa da Silvia Casutt ha pretendì da la regenza dad examinar sche l'uffizi per natira ed ambient sa chatta en il dretg departament.

Numnadamain en il departament per la protecziun da l'ambient da Martin Jäger. Tenor Silvia Casutt giess il departament per economia da Jon Domenic Parolini meglier a prà.

Discussiun animada

Sin quai ha il Cussegl grond manà ina discussiun animada nua che l'Uffizi per ambient e natira ha stuì supportar bler. L'uffizi na saja betg effizient ed emprovi tut per impedir ni almain difficultar projects. Perquai saja quai meglier da metter l'uffizi en il departament per economia, là saja quel pli datiers ad auters uffizis cun ils quals i sto vegnir collavurà.

La finala è la decisiun stada enorm stretga. Ils deputads han decidì cun 54 tar 53 vuschs che la regenza na sto betg examinar da spustar l'uffizi en in auter departament - uschia che tut stat sco enfin uss.