Siglir tar il cuntegn

Chantun Ultimas preparativas per sessiun «extra muros» ad Arosa

Durant 4 dis tschertga il cussegl grond il contact cun la populaziun en la regiun. Questa giada cun la sessiun ad Arosa.

Domenic Gross, Duri Bezzola e Lorenzo Schmid poseschan per fotografs
Legenda: Ils organisaturs han preschentà il program: (da san.) Domenic Gross dal secretariat dal cussegl grond, il president dal cussegl grond Duri Bezzola ed il president communal d'Arosa Lorenzo Schmid. RTR, I. Jaeger

Las tractandas per la sessiun en la regiun dals 15 fin ils 18 da zercladur èn gia preparadas. Quai è tranter auter:

  • l'elecziun dal presidi da la regenza 2016
  • il quint statal 2014 cun ina revisiun da la lescha da finanzas
  • ils rapports da gestiun da las instituziuns chantunalas dal dretg public
  • ina revisiun da la lescha da vias
  • ina lescha chantunala per la protecziun da la populaziun e la protecziun civila.

Dapli contact cun program enramant

120 deputadas e deputads en il cussegl grond dals 39 circuits duain avair la chaschun d'emprender d'enconuscher meglier las regiuns e la populaziun grischuna. Quai tranter auter cun ina festa populara la mesemna saira.

Sessiuns "extra muros"

1 giada da mintga legislatura fa il cussegl grond ina sessiun en las regiuns. Per questa sessiun champestra ad Arosa è sa decidida la conferenza dals presidents. Quai suenter las sessiuns da pli baud a Mustér, Tavau, Landquart, Poschiavo e Samignun.