Siglir tar il cuntegn

Header

audio
Bunura: Parents che tgiran – Iris Hess-Lanfranchi davart las pretensiuns
Or da Actualitad dals 30.10.2019.
laschar ir. Durada: 3 minutas.
cuntegn

Uniun Curvita «Nus vulain dapli sustegn per parents che tgiran»

Parents che tgiran confamigliars, saja quai geniturs, uffants cun impediment u auters confamigliars duain oz star en il center. Els fan ina enorma lavur e perquai vul l'uniun Curvita far attent sin quella e sin ils basegns da parents che tgiran lur confamigliars.

I dettia bleras bunas purschidas per parents che che tgiran lur confamigliars, di Iris Hess-Lanfranchi, la presidenta da Curvita – l'associaziun per parents che tgiran. La glieud na sappia dentant savens betg ch'i dettia talas purschidas e nua ch'ins possia ir per agid. Perquai ha ella fundà la Curvita che duai gidar parents che tgiran lur parents.

Nus vulain dapli qualitad da vita per parents che tgiran – per ch'els na vegnian betg malsauns.
Autur: Iris Hess-Lanfranchi presidenta Curvita

Curvita vul cunzunt er dar ina vusch a parents che tgiran e quai saja gartegià bain en ils dus onns ch'i dat uss l'uniun. La finala èsi ina problematica che pertutga blers e po baud u tard tutgar mintgin da nus en ina furma u l'autra. Perquai è Iris Hess-Lanfranchi cuntenta ch'igl è vegnì conscient a la politica ch'i dat quella problematica e ch'ella prenda mesiras.

Il Cussegl federal ha per exempel preschentà in pachet da mesiras che prevesa tranter auter che geniturs che tgiran in uffant cun impediment u suenter in accident survegnan vacanzas pajadas, sumegliant ad in congedi da maternitad. Ed er la politica chantunala vul preschentar proximamain in plan d'acziun cun diversas mesiras. La buna veglia saja qua, è Iris Hess-Lanfranchi persvasa. Uss saja la dumonda, tge ch'è lura propi er pussaivel finanzialmain.

audio
Bunura: Parents che tgiran – atgnas experientschas da Iris Hess-Lanfranchi
ord Actualitad dals 30.10.2019.
laschar ir. Durada: 4 minutas 12 Secundas.

RR actualitad 07:00

Artitgels legids il pli savens