La lavur saja stada sco fatga sin mesira per el, di il directur partent. El giaja gugent tranter la glieud, communitgeschia gugent e saja gugent stà da viadi dapertut en il chantun. Gliez è era stà necessari, pertge l’uniun dumbra radund 7000 commembers.
Jau sun stà fitg gugent directur
I haja dentant era duvrà spatlas ladas. Gist sch’ins veglia sviluppar insatge dovria quai forza da persvader. U sch’i saja da defender posiziuns magari betg cumadaivlas sco la parola gea per l’iniziativa No-Billag.
Loschs è Jürg Michel ch'igl è reussì en ses temp d'uffizi dad organisar la Fiutscher, l’exposiziun grischuna da professiuns che ha lieu mintga dus onns dapi il 2010.
Il nov
A partir da damaun stat Maurus Blumenthal a la testa da l’uniun. Il nov directur ha studegià sociologia e suenter fatg ina furmaziun da management .
Experientscha da timunar ina organisaziun posseda Blumenthal gia: Dal 2012 fin il 2018 è el stà mainagestiun da l’organisaziun tetgala dals parlaments da giuvenils svizzers.
