Siglir tar il cuntegn

Header

audio
Bunura: Anc mai pestgà uschè pauc sco il 2018
Or da Actualitad dals 15.04.2019.
laschar ir. Durada: 3 minutas 11 Secundas.
cuntegn

Chantun Uschè paucs peschs vid la lantscha sco anc mai

Il 2018 han las pestgadras ed ils pestgaders grischuns pestgà uschè paucs peschs sco anc mai en aua currenta. Las cifras èn alarmantas: En cumparegliaziun cun la media dals ultims 10 onns èsi vegnì piglià 33,5% damain peschs. En cumparegliaziun cun l'onn avant 12,6% damain.

Dapi il 2002, pia dapi ch'il chantun Grischun registrescha las cifras da la pestga, n'han ils pestgaders mai pestgà uschè paucs peschs en aua currenta sco l'onn passà.

La pestga grischuna en cifras


2015
201620172018
flums ed auals
75'87673'02264'52256'394
lais55'10158'34854'02452'407
total130'977131'370118'546108'801

Differenzas regiunalas

Tenor il manader da l'Uffizi da chatscha e pestga, Adrian Arquint datti dentant grondas differenzas tranter las regiuns:

Cunzunt en l'Engiadina è il dumber pestgà sa reducì marcantamain. Percunter è la pestga en il Partenz betg stada mala.
Autur: Adrian Arquintmanader da l'Uffizi da chatscha e pestga
Las differenzas tranter las regiuns.
Legenda: Charta Las differenzas tranter las regiuns. RTR

Blers motivs per la miseria

Ch'igl è vegnì pestgà uschè pauc ha differentas raschuns, uschia il collavuratur scientific da l'Uffizi da chatscha e pestga Marcel Michel:

audio
Marcel Michel davart las raschuns
ord RTR Audio dals 14.04.2019.
laschar ir. Durada: 1 minuta 3 Secundas.

Ils pestgaders cumbattan gia dapi decennis cun l'influenza da las ovras idraulicas u da la protecziun cunter aua gronda che metta sut squitsch ils peschs. Quai saja fitg problematic per ils peschs, uschia Radi Hofstetter, il president da l'Uniun chantunala da peschs.

audio
Radi Hofstetter davart influenza da las ovras idraulicas
ord Actualitad dals 14.04.2019.
laschar ir. Durada: 28 Secundas.

Ils davos onns èn dentant ulteriurs facturs vegnids vitiers:

  • la midada dal clima cun stads da chalira
  • micro-contaminaziun en l'aua
  • bovas da glera han destruì spazi vital dals peschs

Pli blers pestgaders dal di

Il dumber da pestgaders e pestgadras n'ha dentant betg influenzà directamain la pestga: Cun radund 8'500 patentas da pestga è il dumber da patentas vendidas restà sin il livel dals ultims onns. Tge che croda dentant en egl è, che las patentas dal di èn vegnidas pli popularas ed i dat pli paucs pestgaders che cumpran la patenta per ina entira stagiun.

Nagina surpraisa per WWF

Per il WWF Grischun n’èn questas cifras nagina surpraisa. En general giaja il dumber dals peschs enavos. Lur spazi da viver saja periclità. Differents aspects gioghian qua ina rolla – in factur impurtant en il Grischun sajan er las ovras electricas.

video
Il spazi da viver dals peschs è periclità
Or da Telesguard dals 15.04.2019.
laschar ir. Durada: 2 minutas 22 Secundas.

I dettia dentant speranza, ch’il spazi da viver dals peschs daventia puspè pli natiral. La lescha davart la protecziun da las auas pretenda numnadamain pliras adattaziuns che las ovras electricas ston realisar fin il 2030 – ed uschia spera il WWF Grischun ch’i giaja plaunsieu en la dretga direcziun.

RR novitads 06:00

Artitgels legids il pli savens