Siglir tar il cuntegn

Header

Navigaziun

Foti da Peter Bürcher.
Legenda: Peter Bürcher maina dapi duas emnas l'uvestgieu da Cuira. Quai fin ch'i dat la schliaziun definitiva. Keystone
cuntegn

Uvestgieu Cuira «Ina sligiaziun per in pèr mais»

Suenter che Vitus Huonder ha dà giu ses uffizi sco uvestg da Cuira, maina l'administratur apostolic Peter Bürcher l'uvestgieu. Quai è dentant mo ina soluziun ad interim. Ussa ha Peter Bürcher prendì per l'emprima giada posiziun envers las medias.

Fin avant quatter onns era Peter Bürcher uvestg a Reykjavik en Islanda. Cura ch'el è vegnì pensiunà è el turnà en Svizra ed ha vivì fin avant curt en il chantun Sviz.

Ch'el è vegnì dumandà da papa Francestg persunalmain da surpigliar l'uvestgieu a Cuira ad interim, è stà ina gronda surpraisa per el. Dentant tuttina menziunescha el:

La soluziun ussa, è mo ina soluziun per insaquants mais. Papa Francestg sa dat bregia da prest chattar in bun successur per Vitus Huonder.
Autur: Peter Bürcher

La grondezza da l'uvestgieu sco sfida

En las davosas duas emnas ha Bürcher sur tut manà blers discurs ed emprendì d'enconuscher glieud. L'uvestgieu da Cuira s'auda tar in dals gronds en Svizra. Quai ord il motiv, ch'el cumpiglia sper il chantun Grischun era ils chantuns Sviz, Uri, Glaruna, Turitg, Sur- e Sutsilvania. I dovria temp da survegnir qua ina survista. Per trair ina bilantscha saja aunc memia baud.

Finamiras e midadas

I dovra refurmas, betg mo en l'uvestgieu da Cuira mabain insumma per la baselgia catolica. La baselgia sto sa sviluppar vinavant. Schebain cun sias finamiras – ma er cun il spiert che regia.
Autur: Peter Bürcher

RR actualitad 17:00