Siglir tar il cuntegn

Header

video
Il nov uvestg da Cuira ha num Joseph Bonnemain
Or da Telesguard dals 15.02.2021.
laschar ir
cuntegn

Uvestgieu da Cuira Joseph Bonnemain è il nov uvestg da Cuira

Papa Francestg ha elegì il delegà da l'administratur apostolic, Joseph Bonnemain, sco nov uvestg da Cuira. Bonnemain è in dals trais candidats ch'il papa aveva gia preschentà al chapitel catedral.

Joseph Bonnemain, il nov uvestg da Cuira, è fin uss stà uffizial da l'uvestgieu da Cuira e delegà da l'administratur apostolic, Peter Bürcher. Bonnemain è in dals trais candidats ch'il papa aveva gia preschentà al chapitel catedral il november da l'onn passà. Ils canonis avevan quella giada dentant refusà la glista e returnà quella al papa. Uss ha il papa decis sez.

Joseph Bonnemain è dapi 40 onns activs en l'uvetgieu da Cuira. El ha fatg carriera sut l'uvestg conservativ, Wolfgang Haas. Pli tard è Bonnemain dentant lura sa distanzià dal curs ultraconservativ. Il commember da l'Opus Dei vala sco moderà ed uschia sco ideal intermediatur per l'uvestgieu dischunì.

Joseph Bonnemain

Personen-Box aufklappenPersonen-Box zuklappen
  • Il nov uvestg da Cuira è naschì ils 26 da fanadur 1948 a Barcelona, nua ch'el è creschì si ed ha frequentà las scolas fin tar la matura il 1967.
  • Silsuenter è el vegnì en Svizra ed ha sco emprim fatg il studi da medischina cun doctorat a l'Universitad da Turitg.
  • Il 1975 è el lura sa decidì da far in segund studi da filosofia e teologia a Roma.
  • Ils 15 d'avust dal 1978 è el lura vegnì ordinà sco sacerdot da la prelatura Opus Dei.
  • Suenter dus onns en la regiun spagnola da Navarra, è Bonnemain lura il 1980 returnà en Svizra, nua ch'el ha promovì en dretg da baselgia.
  • Fin il 1989 è el silsuenter stà spiritual per students a Turitg e per l'Ospital Limmattal.
  • Dapi il 2008 è Bonnemain commember dal cussegl episcopal e dapi il 2011 er delegà per relaziuns tar organisaziuns da dretg ecclesiastic.
  • Dapi 2015 presidiescha l'uffizial Joseph Bonnemain la cumissiun da furmaziun diocesana.

Emprima messa en la catedrala da Cuira

Il nov elegì uvestg da Cuira, Joseph Bonnemain, ha tegnì il glindesdi saira in'emprima messa en la catedrala da Cuira. Ensemen cun l'administratur apostolic Peter Bürcher e l'uvestg auxiliar Marian Eleganti ha el celebrà in'eucaristica sco segn da l'unitad. Envers las medias n'ha Bonnemain anc betg prendì posiziun.

Tenor il pledader da l'uvestgieu, Giuseppe Gracia, veglia Bonnemain en emprima lingia ch'ins fetschia in pass in vers l'auter e ch'i dettia ina vaccinaziun betg be cunter corona, ma er per fraternitad e speranza. Cura che Bonnemain survegn l'ordinaziun episcopala, n'è anc betg enconuschent. In termin pussaivel fiss da Pasca.

Marian Eleganti sa retira

Il medem mument annunzia l'uvestgieu, che papa Francestg ha acceptà la dumonda da l'uvestg auxiliar dad emeritar. Eleganti aveva inoltrà quella dumonda gia il 2019. Marian Eleganti po pia sa retrair per immediat.

RTR novitads 12:00

Artitgels legids il pli savens

Scrollar a sanestra Scrollar a dretga