L’anteriur uvestg da Cuira, Amédée Grab, è mort en la vegliadetgna dad 89 onns. El saja mort la dumengia nunspetgadamain en ina chasa da tgira a Roveredo, ha communitgà l’uvestgieu da Cuira.
L'emprim ch'ha midà uvestgieu
Il 1998 ha el surprendì il timun da l'uvestgieu da Cuira da Wolfgang Haas. Avant aveva el manà la diocesa da Losanna, Genevra e Friburg. El è stà l'emprim uvestg en uffizi ch'ha midà d'in uvestgieu ad in auter. Amédée Grab era enconuschent sco um diplomatic e conciliant. Sut sia direcziun è la situaziun en l’uvestgieu da Cuira sa calmada, suenter il temp burascus cun ses predecessur, Wolfgang Haas.
Il 2007 ha Amédée Grab lura demissiunà sco uvestg da Cuira ed è sa retratg en la Casa di Cura Immacolata a Roveredo.
Il requiem pontifical ha lieu ils 27 da matg a las 14:00 en la catedrala a Cuira. Amédée Grab vegn sepulì en il santeri da la catedrala.
Ord l'archiv
RR novitads 10:00